«Արեւմտյան լրատվամիջոցներն արդեն Էրդողանին համեմատում են դիկտատորի հետ, իսկ Գերմանիայում օրեր առաջ նույնիսկ նշեցին ֆյուրեր մականունը»,- այսօր՝ մայիսի 19-ին, լրագրողների հետ հանդիպման ընթացքում հայտարարեց թուրքագետ Անդրանիկ Իսպիրյանը:
Նրա խոսքերով՝ գլխավոր ինտրիգը Թուրքիայում օգոստոսին տեղի ունեցող նախագահական ընտրություններն են, քանի որ իշխող կուսակցությունը դեռ չի հայտարարել, թե ո՞ւմ թեկնածությունն է առաջադրելու: Սակայն օրեր առաջ տեղի ունեցած Թուրքիայի իշխող կուսակցության գլխավոր համաժողովը որոշ հանգամանքներ պարզ է դարձնում, քանի որ այդ համաժողովի ընթացքում պարզ դարձավ, որ Էրդողանը այլեւս չի կարող ընտրվել որպես պատգամավոր, հետեւաբար՝ վարչապետ դառնալ չի կարող: Այսինքն՝ Թուրքիայի իշխող կուսակցության ներքին կանոնակարգի համաձայն՝ երեք անգամից ավելի որեւէ մեկը չի կարող մտնել խորհրդարան, իսկ Էրդողանն արդեն 3 անգամ ընտրվել է: Անդրանիկ Իսպիրյանը նշեց, որ չնայած դրան, Էրդողանի վերջին հայտարարությունները ցույց են տալիս, որ նա արդեն որոշել է առաջադրվել եւ կառաջադրվի, եթե ֆորսմաժորային իրավիճակ չստեղծվի, իսկ այդ իրավիճակը պարոն Իսպիրյանը չբացառեց.
«Նա ասաց, երբ ես դառնամ նախագահ, ես չեմ լինելու արարողակարգային, այսինքն՝ ձեւական նախագահ չեմ լինելու եւ բացի այդ՝ նաեւ մնալու եմ կուսակցության կողքին, այսինքն՝ պարզ հասկացրեց, որ կա նման միտում՝ նախագահի թեկնածու առաջադրվելու, թեեւ Թուրքիայի երկու փոխվարչապետն էլ իրենց խոսքերում նշեցին, որ Գյուլից շատ գոհ են եւ որեւէ խնդիր չեն տեսնում Գյուլի հետագա պաշտոնավարման հարցում»:
Թուրքագետը նշեց, որ Էրդողանը հնարավորություններ ունի միայն այն դեպքում, եթե իշխանության կողմից միայն իր թեկնածությունն առաջադրվի՝ առանց Գյուլի, քանի որ հենց առաջին փուլում Գյուլը Էրդողանին հաղթելու մեծ հնարավորություններ ունի: Պարոն Իսպիրյանն ասաց, որ խոսակցություններ կան, որ Աբդուլլահ Գյուլը ցանկանում է վարչապետ դառնալ, սակայն վարչապետ դառնալու համար նա պետք է սպասի հաջորդ խորհրդարանական ընտրություններին:
Ամի ՉԻՉԱԿՅԱՆ
