Արտերկրում հավատարմագրված Հայաստանի դեսպանները բողոքել են Հովիկ Աբրահամյանին, որ Հայաստանի նախարարները դեսպանների ներկայացրած ներդրումային ծրագրերը ուշադրության չեն արժանացնում: Այսօր այս մասին կառավարության նիստին հայտարարեց ՀՀ վարչապետ Հովիկ Աբրահամյանը:
Վարչապետն ասաց, որ օրերս դեսպանների հետ հանդիպման ժամանակ նրանք դժգոհել են կոնկրետ նախարարներից: Իսկ թե ո՞ր նախարարներից, վարչապետը անուններ չտվեց:
Հ. Աբրահամյանի խոսքերով՝ դեսպանների աշխատանքի բաղադրիչ մաս պետք է լինի տարբեր երկրներից Հայաստան ներդրումների ներգրավումը. «Դեսպաններն ասել են, որ իրենց առաջարկությունները պատշաճ ուշադրության չեն արժանանում նախարարների կողմից: Իսկ եթե արժանանում են, դեսպաններն այդ մասին տեղեկացված չեն լինում: Դեսպաններն ասում են, որ չեն ստանում ներդրումային առաջարկություններ նախարարություններից: Դեսպանները եթե հանդիպում են ներդրողներին, պետք է ունենան ծրագրեր: Համապատասխան նախարարները պետք է մտածեն դեսպաններին լիարժեք ներդրումային ծրագրեր տրամադրելու մասին»:
Նելլի ԲԱԲԱՅԱՆ
