«Կետերում կա այն, ինչի շուրջ մենք համաձայնվել ենք: Այս պարզաբանումը պետք է լրիվ բավարար լինի: Իսկ Կոնգրեսի դիրքորոշումը ես արդեն հայտնեցի, այլ ուժերի փոխարեն խոսել չեմ կարող»,- լրագրողների հետ հանդիպման ժամանակ հայտարարեց ՀԱԿ խմբակցության ղեկավար Լևոն Զուրաբյանը` քառյակի 12 կետանոց պահանջների հրապարակումից հետո: Լեւոն Զուրաբյանը պատասխանում էր հարցին` ինչո՞ւ դրանցում չկա իշխանափոխության, մասնավորապես ՀՀ նախագահ Սերժ Սարգսյանի հրաժարականի պահանջը, քանի որ ՀԱԿ-ի կարծիքով՝ դա արդեն բազմաթիվ խնդիրներ կլուծի:
ՀՅԴ խմբակցության ղեկավար Արմեն Ռուստամյանն էլ նույն հարցի վերաբերյալ ասաց, որ անձերի խնդիր գոյություն չունի. «Պարզապես Սերժ Սարգսյանի հեռացումը երկիրը չի փրկի, եթե համակարգը չի փոխվելու: Պետք է այնպիսի համակարգ ձևավորվի, որ իշխանությունը ծառայի ժողովրդին: Սա է խնդիրը, որը դեռ պետք է համաձայնեցնենք»:
«Մեզ համար տաբու հարցեր և խնդիրներ չկան, այդ մասին ասվել է համագումարից հետո: Այս փուլում ԲՀԿ-ն իր երեք գործընկերների հետ միասին նպատակահարմար ենք գտել այս հարցերի առաջադրումը իշխանությանը: Կլուծվեն, թե ոչ` շատ կարճ ժամանակում կերևա»,- ԲՀԿ-ի մոտեցումը ներկայացրեց խմբակցության քարտուղար Նաիրա Զոհրաբյանը: Նա հիշեցրեց, որ Տիգրան Սարգսյանի կառավարությունը վեց տարի ավերեց ու քանդեց երկիրը, այնպես որ, նրա հրաժարականը պետք է ավելի վաղ պահանջվեր:
12 կետերում, տիկին Զոհրաբյանի համոզմամբ, ներկայացված են անհապաղ լուծում պահանջող խնդիրներ, թեեւ խնդիրները մեր երկրում ավելի շատ են:
Կարդացեք նաև
«Ժառանգություն» խմբակցության ղեկավար Ռուբեն Հակոբյանն էլ, համաձայնելով դաշնակցական իր գործընկերոջ հետ, նշեց. «Մենք այնքան միամիտ չենք, որ մտածենք, թե այս 12 կետով պետությունում արմատական փոփոխություններ կլինեն: Քաղաքականությունը հնարավորի արվեստ է, մենք մեր աշխատանքները շարունակելու ենք»:
Ռուբեն Հակոբյանը նաեւ հավելեց, որ իրենք այնչափ միամիտ չեն, որ կարծեն, թե այս մոտեցումները իրականացվելուց հետո, երկրում բավականին փոփոխություններ կլինեն: Նա կարծում է, որ ժամանակը ամեն ինչ ցույց կտա եւ իր տեղը կդնի:
Քառյակի ներկայացուցիչները, պատասխանելով դիտարկմանը, որ այսպիսով ընդդիմությունը, փաստորեն, արձակուրդ է գնում, ասացին, որ նման բան չկա: Իրենք շարունակելու են այս ընթացքում ակտիվորեն գործել քաղաքական դաշտում, արձագանքել բոլոր զարգացումներին: Առաջինը կլինի առաջիկայում ՀՀ ԱԳ նախարարի բացատրությունները լսել`Աստանայում տեղի ունեցածի վերաբերյալ:
Նելլի ԳՐԻԳՈՐՅԱՆ
