Խոշտանգումների կանխարգելման կոմիտեի տվյալներով` Հայաստանում ոստիկանական բաժիններում հայտնված քաղաքացիների 90 տոկոսը լուրջ խոշտանգումների է ենթարկվում:
«Ոստիկանական բաժիններում մարդիկ ենթարկվել են ծեծի, ջարդի: Որպես կանոն, փաստաբան չեն ունեցել: 2012-ի նոյեմբեր-դեկտեմբերի կտրվածքով 135 քաղաքացուց փաստաբան է ունեցել միայն 3-ը: Նրանք մանրամասն նկարագրել են, թե ինչպես են իրենց ծեծել, ինչ ձեւերով ու գործիքներով»,- այսօր «Մեդիակենտրոնում» խոշտանգումների զոհերի աջակցության միջազգային օրվա առիթով կազմակերպված ասուլիսի ժամանակ ներկայացրեց պարոն Իշխանյանը: Նա պատմեց, որ վերջերս էլ ոստիկանական բաժնում դաժան ծեծի է ենթարկվել Շանթ Հարությունյանի գործով դատական նիստի ընթացքում դատարանի բակում գազային ատրճանակից կրակոցներ արձակած Հայկ Կյուրեղյանը:
«Իրավունքի գերակայություն» հ/կ համահիմնադիր Արտակ Զեյնալյանն էլ շարունակեց, որ ձերբակալվելու պահից սկսած ոստիկանությունը պարտավոր է ստանձնել անձի պաշտպանությունը: Նրա խոսքով,վարչական դատարանում մի քանի գործերով իրենք հիմա բարձրացրել են այդ հարցը, թե չի ապահովվել անձի՝ պաշտպան ունենալու իրավունքը:
Կարդացեք նաև
Քաղաքացիական ակտիվիստ Դվին Իսանյանսն էլ պատմեց, որ մայիսի 13-ին՝ Մաշտոցի պուրակի անվանափոխության օրը, ինքն ու մի խումբ քաղաքացիներ հավաքվել էին պուրակում ու դեռ ակցիան չսկսած քաղաքացիական հագուստով մի խումբ ոստիկաններ մոտեցել են ու կոպիտ հրելով արգելել առաջ գնալ.«Ոստիկան եկավ հայհոյեց, գոռաց, գնացեք էստեղից, ձեզ հեսա ես իմ ինչ կանեմ: Մենք էլ ասացինք՝ արի մոտեցի ու արա, ինչ ասում ես: Միանգամից սկսեցին հրեցին, գցեցին մեզ խոստերի մեջ ու քաշքշելով բարձրացրին, քարշ տվեցին փողոց, մեջքս խփեցին քարերին, հարվածներ ստացա մարզված մարդկանց կողմից, ոտքով մեկը խփեց բերանիս, հայհոյանքների շարան»:
Արփինե ՍԻՄՈՆՅԱՆ
