Հանրային ծառայությունները կարգավորող հանձնաժողովի շենքի առջեւ էլեկտրաէներգիայի սակագնի թանկացման դեմ պայքարող քաղաքացիների միջեւ տարաձայնություններ են սկսվել:
Քիչ առաջ Երեւանի փոխոստիկանապետ Վալերի Օսիպյանը հայտարարել էր, որ կրկին կբանակցի հանձնաժողովի աշխատակազմի հետ գոնե տասը քաղաքացու ներս թողնել՝ քննարկմանը մասնակցելու, բայց բանակցություններից հետո նրան չհաջողվեց խոստումն իրագործել:
Վերադարձավ ու առաջարկեց երկուական քաղաքացի հինգ րոպեով ու հերթափոխով մեկը մյուսին փոխարինելով ներս մտնել ու դուրս գալ:
Այս առաջարկը տարաձայնությունների տեղիք տվեց, քաղաքացիների մի մասի սրտով էր, մյուս մասը կտրուկ դեմ էր:
Կարդացեք նաև
«Ակնհայտ է, որ ժամանակ ձգելու գործընթաց է գնում, որ հակահանրային որոշումը կայացնեն, դա հանդուրժել չենք կարող,մնում է՝ հինգ րոպե ժամանակ տանք, որ հանձնաժողովի նախագահ Ռոբերտ Նազարյանը դուրս գա կամ մենք կդիմենք կտրուկ քայլերի»,- սպառնաց քաղաքացի Արգիշտի Կիվիրյանը:
Երեւանի փոխոստիկանապետն էլ հավաքվածներին հորդորեց չտրվել Կիվիրյանի սադրանքներին ու ասաց, որ ոստիկանությունն ամեն ինչ անում է՝ նրանց հետ կոնֆլիկտի մեջ չմտնելու համար:
Այս պահին ակտիվիստները գոռում են «Դեմ ենք» ու պահանջում են իրենց ներս թողնել:
Երկու քաղաքացի ընդունեցին փոխոստիկանապետի առաջարկը ու ներս մտան:
Արփինե ՍԻՄՈՆՅԱՆ
