Այսօր հանրային ծառայությունները կարգավորող հանձնաժողովում քննարկվում է էլեկտրաէներգիայի սակագնի բարձրացման հարցը:
Առաջարկվում է էլեկտրաէներգիայի սակագին սահմանել՝ ցերեկային սակագինը 32.85 դրամ/կվ ժամ, գիշերային սակագին՝ 28.85 դրամ, իսկ 6(10) լարմամբ սնվող սպառողների համար ցերեկային սակագին՝ 38.85 դրամ, գիշերային՝ 28.85 դրամ: Իսկ 0,38կՎ լարմամբ սնվող սպառողների համար ցերեկային սակագին՝ 41,85 դրամ, գիշերային սակագին՝ 31,85 դրամ:
Էլեկտրական ցանցերը, դիմելով Հանրային ծառայությունները կարգավորող հանձնաժողովին, նշել է, որ վնասներ է կրում, ճեղքվածը մոտ 18 միլիարդ դրամ է, էներգիա արտադրողներից գնվող էլեկտրաէներգիայի սակագինը բարձր է, ուստի անհրաժեշտ է բարձրացնել սպառողներին տրամադրվող էլեկտրաէներգիայի գինը:
Այս պահին հանձնաժողովում բուռն քննարկում է, Ազգային ժողովի պատգամավորները հարցեր են ուղղում հանձնաժողովի անդամներին: ՀԱԿ պատգամավոր Արամ Մանուկյանը հարց ուղղեց, թե մինչ օրս հանրությունը գիտի, որ Հայաստանն ինքնաբավ է, եւ միայն էլեկտրաէներգիա է արտահանել, սակայն պարզվում է, որ մենք Վրաստանից էլեկտրաէներգիա ենք ներմուծում, ինչո՞վ է սա պայմանավորված: Այս հարցին ի պատասխան հանձնաժողովի ներկայացուցիչն ասաց, որ Վրաստանը Հայաստանի միջոցով էլեկտրաէներգիա է արտահանում Իրան:
Կարդացեք նաև
Հանձնաժողովի սակագնային քաղաքականության վարչության պետ Գարեգին Բաղրամյանը փորձեց պարզաբանել, որ դա սեզոնային ներկրում է Երևանի ՋԷԿ-ը եւ իր էլեկտրաէներգիայի հետ միասին արտահանում է Իրան եւ 1/3 հարաբերակցությամբ գազ է ներկրում:
Նիստի մանրամասներն՝ առաջիկայում
Նելլի ԲԱԲԱՅԱՆ
