«Ադրբեջանի քաղաքականությունը հստակ ռազմավարական բնույթ է կրում, այսինքն` նրանց յուրաքանչյուր քայլ տրամաբանված է»,- այսօր` հուլիսի 18-ին, «Հայելի» մամլո ակումբում լրագրողների հետ զրույցի ընթացքում հայտարարեց երգիչ, երգահան Վահան Արծրունին:
Նա համարում է, որ Ադրբեջանը հստակ ծրագրային նպատակներ ունի թե’ երկրի ներսում եւ թե’ երկրից դուրս, սակայն Հայաստանի պարագայում նա այդպիսի ռազմավարություն չի տեսնում: Պարոն Արծրունու կարծիքով` երբ որ պետությունը չունի հստակ ռազմավարություն, միշտ այդ խնդիրների բեռը ծանրանում է այն զինվորների ուսին, որոնք որ կանգնած են սահմանին, այսինքն` զինվորը սկսում է լուծել պետական դիվանագիտական խնդիրը իր արյան եւ կյանքի գնով.
«Մենք կարող են համաձայնել կամ չհամաձայնել նրանց քաղաքականության հետ, բայց հստակ է, որ նրանք որոշակի քաղաքականություն ունեն: Այսինքն` մարդ, որ զինվում է, այդ զենքը պատերից կախելու համար չէ պահում. Բնական է, որ ինչ-որ պահի նա պետք է խոսի ու կխոսի առաջինը մեր դեմ: Նրանք ցույց են տալիս աշխարհին, որ հստակ գործոն են այս տարածաշրջանում, եթե ոչ հիմա, ապա մոտ ապագայում հաշվի կնստեն իրենց հետ, որովհետեւ իրենք հարուստ են, իրենք զինված են»:
Հարցին, թե Սերժ Սարգսյանի` Արգենտինայում կատարած հայտարարությունը, որ հայ ժողովուրդը մտահոգված է, քանի որ Ռուսաստանը Ադրբեջանին զենք է վաճառում, ուշացա՞ծ չէր, Վահան Արծրունին պատասխանեց, որ խնդիրները կուտակվել էին մինչեւ այն պահը, որ այսպիսի զգույշ ձեւակերպումներ տալով փորձել վերջիվերջո անդրադառնալ այդ խնդրին.
«Զենքը սկսեց խոսել. Լրջագույն իրավիճակ է մեր սահմաններում, այսինքն` 20 տարի առաջ, եթե նման իրավիճակ լիներ մեր սահմաններում, մենք կհասկանայինք, որ սա պատերազմի սկիզբ է»:
Ամի ՉԻՉԱԿՅԱՆ
Կարդացեք նաև
