«Իհարկե, սա քաղաքական որոշում է և սա Ռուսաստանի պահանջն է»,-Aravot.am-ի հարցին՝ արդյոք ՀՀ կառավարության որոշումը Վ. Լոմոնոսովի անվան պետական համալսարանի հայաստանյան մասնաճյուղը ՀՀ պետական բյուջեից ֆինանսավորելու մասին քաղաքական որոշում չէ՞, այսպիսի կարծիք հայտնեց ազգագրագետ Հրանուշ Խառատյանը:
Հետաքրքրվեցինք՝ սա կրթական բիզնեսի ոլորտում անհավասար մրցակցային պայմաններ չի՞ ստեղծում, այն դեպքում, երբ ՀՀ բուհերի մեծամասնությունը ինքնաֆինանսավորվող են: Տիկին Խառատյանը պատասխանեց. «Այո, և սա արվում է այն դեպքում, երբ, իրոք, հայաստանյան բուհերը հիմնականում ինքնաֆինանսավորվող են: Սրանով ստեղծվում են անհավասար պայմաններ:
Միայն Լոմոնոսովի համալսարանի մասնագետները, դասախոսների գործուղումները, աշխատավարձերը, գիտաժողովների կազմակերպումը պիտի ֆինանսավորվեն ՀՀ պետբյուջեից, և ՀՀ-ի՝ քիչ թե շատ կարող դասախոսները իրենց ուժերը պետք է ներդնեն այստեղ՝ բնականաբար հարվածի տակ դնելով մեր՝ մրցակցությանը չդիմացող, այդ թվում պետական բուհերը: Ամեն ինչ արվում է տեղական նախաձեռնությունները խեղդելու համար»:
Տիկին Խառատյանը, վկայակոչելով ՀՀ Սահմանադրությունը, նշում է. «Սահմանադրորեն պետությունը պարտավոր է հավասար հնարավորություններ ստեղծել, եթե պետությունը մի արտասահմանյան բուհի համար իր բյուջեից ներդրումներ է անում, մի՞թե սա անհավասար պայմանների ստեղծում չէ կրթական բիզնես միջավայրում և կրթության քաղաքականության ոլորտում»:
Կարդացեք նաև
Հրանուշ Խառատյանը տարակուսանք է հայտնում՝ այդ ինչպե՞ս է, որ ՀՀ-ում գործող Ֆրանսիական, կամ Ամերիկյան, կամ նոր բացվող Դիլիջանի միջազգային դպրոցը ասենք չունեն պետական ֆինանսավորում, բայց հենց Լոմոնոսովի համալսարանը, «եթե նույնիսկ օդից ընկած գոհար էլ լիներ», պետք է ֆինանսավորվի ՀՀ պետբյուջեից: Այնուհետև փոքր-ինչ վրդովված եզրափակում. «Ո՞րն է սրա՝ կրթական բիզնեսի հավասար հնարավորությունների ապահովումը: Սա ակնհայտ պետության կողմից շուկայական տնտեսությանը ոտք գցելու հսկա քայլ է, ինչպես համայնքներին վերադարձված հողային ֆոնդը եղավ, որը ամբողջությամբ սպանեց մանր հողատերերին: Պետությունն ինքը անընդհատ քայքայում է տնտեսվարման հավասարության հիմքերն ամեն քայլափոխի»:
Տաթև ՀԱՐՈՒԹՅՈՒՆՅԱՆ
Հ. Գ. Նշենք, որ կրթության եւ գիտության նախարար Արմեն Աշոտյանն այս առնչությամբ պարզաբանել էր. «Իրականում Հայաստանում Մոսկվայի Մ.Վ. Լոմոնոսովի անվան պետական համալսարանի մասնաճյուղը ՀՀ պետական բյուջեից ֆինանսավորվելու է յուրաքանչյուր ուսումնական տարվա համար նախատեսված պետական պատվերի տեղերի հաշվին, ճիշտ այնպես, ինչպես պետական պատվեր, հետևաբար` պետական գումար են ստանում Հայաստանում Ամերիկյան կամ Ֆրանսիական համալսարանները: Բուհի գործունեության համար անհրաժեշտ այլ ֆինանսական միջոցներ ներգրավվելու են Հայաստանի մասնավոր հատվածից` ներդրումների տեսքով»:
