Մասնագիտական պարտականությունների նկատմամբ անբարեխիղճ վերաբերմունք դրսևորելու և դրանք ոչ պատշաճ կատարելու հետևանքով անզգուշությամբ բուժվող հիվանդի մահն առաջացնելու կասկածանքով օրերս ձերբակալվել է «Վանաձոր ԲԿ» ՓԲ ընկերության վիրաբուժական բաժանմունքի վարիչ Վլադիմիր Ղուկասյանը:
ՀՀ ոստիկանությունից Aravot.am-ի հետ զրույցում հաստատեցին տեղեկությունը:
2013 թվականի հոկտեմբերի 12-ին կրծքավանդակի ծակած-կտրած թափանցող վերքով «Վանաձորի բժշկական կենտրոն» էր տեղափոխվել Երևան քաղաքի բնակիչ, անչափահաս Դ. Հովակիմյանը:
Դ. Հովակիմյանը Վանաձորում մասնակցում էր ձեռքի գնդակի հանրապետական մրցաշարին:
ՀՀ դատախազության տվյալների համաձայն` Դ. Հովակիմյանի մահվան պատճառի հետ կապված կրկնակի հանձնաժողովային դատաբժշկական փորձաքննության եզրակացությամբ հաստատվել են նախորդ փորձաքննությամբ արձանագրված բացթողումներն ու թերությունները, ինչպես նաև այն, որ «Վանաձոր ԲԿ» ՓԲ ընկերությունում Դ. Հովակիմյանին բուժօգնության ցուցաբերման թերությունները և բացթողումները գտնվում են պատճառահետևանքային կապի մեջ նրա մահվան հետ, որոնց առավել վաղ իրականացումը զգալիորեն կմեծացներ բարենպաստ ելքի հավանականությունը՝ հնարավորություն ընձեռելով փրկել Դ. Հովակիմյանի կյանքը:
Նախաքննությունը շարունակվում է:
Անուշ ԲՈՒԼՂԱԴԱՐՅԱՆ
