Ֆեյսբուքի օգտատեր Վահե Անթանեսյանը հրապարակել էր ահազանգ՝ ուղղված Ամենայն հայոց կաթողիկոսին, մշակույթի նախարարին, Էկոնոմիկայի նախարարության զբոսաշրջության վարչության պետին: Խնդիրը վերաբերում է միջնադարյան հուշարձանում՝ Գոշավանքում առկա վիճակին: Նրա հրապարակած ուսանկարներում երեւում է, որ եկեղեցու ներսում դրված է վառարան, կողքին էլ «հանգրվանել» է սրճեփը, ինչ-որ մեկն էլ տաքանում է վառարանի մոտ:
ՀՀ մշակույթի նախարարության Պատմության և մշակույթի հուշարձանների պահպանության գործակալության պետի տեղակալ Սամվել Մուսոյանը Aravot.am-ին պարզաբանեց, որ խնդրին իրենք տեղյակ են: «Մարդ է ուղարկվել, որ տեղում հարցը ուսումնասիրի: Դա կարծեմ թե արել է տեր հայրը: Տրվել է հանձնարարական, որ հարցերը կարգավորվեն: Մոմ վաճառելը եկեղեցու ներսում տեղում թույլատրելի է: Որ ձմեռը ջեռուցման հարց է առաջանում, պետք է լուծել, բայց ի՞նչ ձեւով, դրա համար կա մասնագիտացված կազմակերպություն եւ գիտամեթոդական խորհուրդ, ըստ որի՝ պետք է լուծումներ տրվի»,- ասաց Մուսոյանը:
Նրա խոսքով, եկեղեցին հանձնված է Մայր աթոռի տնօրինությանը, հետեւաբար նաեւ Մայր աթոռն է պատասխանատու հուշարձանի համար:
Կարդացեք նաև
Հիշեցնենք, որ Գոշավանքը միջնադարյան վանական համալիր է, 12-13-րդ դարերում եղել է հոգեւոր եւ մշակութային խոշոր կենտրոն: Գոշավանք անունն էլ նրան տրվել է ի պատիվ Մխիթար Գոշի, որը 1188 թ.-ին, իշխան Իվանե Զաքարյանի աջակցությամբ, հիմնադրել է վանքը:
Գոհար ՀԱԿՈԲՅԱՆ
