Քրեագետ Սերգեյ Գալոյանը վստահեցնում է, որ վաղը հայտնի բանդայի գործով դատավարության ժամանակ շատ կարեւոր հայտարարություն է լինելու: Թե ինչ հայտարարություն, նա այսօր «Ֆորում» ակումբում ասուլիսի ժամանակ չցանկացավ մանրամասնել: Միայն ասաց, որ ուսումնասիրել է այդ գործը ու կարծում է՝ բոլոր մեղադրյալները պետք է արդարացվեն, որովհետեւ անմեղ են. «Արդեն ուսումնասիրել եմ այդ գործը, այդ դատավարությունը թատրոն է»:
Նա ասաց, որ իր բացահայտումները բանդայի գործով կներկայացնի առաջիկայում՝ նոր գրքով:
Առայժմ պարոն Գալոյանը ներկայացրեց իր նոր հրատարակած գիրքը՝ «հանցագործությունների քրոնիկոն»: Այս գրքում ներկայացրել է 1974 -2014 թվականին կատարված աղմկահարույց հանցագործությունները:
«Հոկտեմբերի 27, Մարտի 1, Մինասի արվեստանոցի հրդեհ»,- թվարկեց պարոն Գալոյանը:
Հարցին, թե «Մարտի 1-ի» դեպքերով ինչ է պարզել, պարոն Գալոյանը չկարողացավ պատասխանել. «Մարտի 1-ը ներկայացվել է այսպես, որեւէ մեկը չի կարող ասել նույնիսկ մահացածների թվաքանակը, առավել եւս՝ անուն, ազգանուն չեն կարող հիշել: Ի՞նչ է եղել, ովքե՞ր են զենք մատակարարել, ովքե՞ր են արձակել, ո՞ւմ մեղքով է այդ ամեն ինչը եղել, այս գրքում կան»:
Ովքե՞ր են զենք մատակարարել, քանի՞ զոհ է եղել հարցերին նա ասաց՝ չի հիշում. «Գրքում կա»:
Կարդացեք նաև
Ինչ վերաբերում է գրքում հոկտեմբերի 27-ի իր բացահայտումներին, կրկին առանց մանրամասնելու ասաց, եթե իր հրապարակած տվյալները մի խելոք մարդու հայտնի լինեին, հաստատ կկանխեր հոկտեմբերի 27-ը:
Արփինե ՍԻՄՈՆՅԱՆ
