Առաջիկա ամիսներին շփման գծի ողջ երկայնքով Ադրբեջանը պատրաստվում է զինել քաղաքացիական բնակչությանը:
Այս մասին հայտնի դարձավ չորեքշաբթի երեկոյան, երբ ադրբեջանական լրատվամիջոցները հրապարակեցին Իլհամ Ալիևի՝ երկրի սահմանների պաշտպանության ամրապնդմանն ուղղված միջոցառումների մասին հրամանագրի տեքստը:
«Անհրաժեշտ է միջոցներ ձեռնարկել կամավորական պարեկային ջոկատների ստեղծման ուղղությամբ, որոնք կհամալրվեն Ադրբեջանական Հանրապետության և Հայաստանի Հանրապետության զինված ուժերի շփման գծին հարող շրջանների բնակիչներից»,- նշված է Ալիևի հրամանագրում:
Հուլիսին շփման գծի երկայնքով Ադրբեջանի կողմից իրականացվող դիվերսիոն գործողությունների ակտիվացմանը զուգահեռ Հայաստանում ևս կարծիքներ էին հնչում, որ հարկավոր է սահմանամերձ շրջանների բնակիչներից կամավորական ջոկատներ ձևավորել, որոնք կանոնավոր բանակի ստորաբաժանումների հետ միասին ձեռնամուխ կլինեն սահմանային գյուղերի պաշտպանությունը: Սերժ Սարգսյանը, սակայն, հուլիսի 24-ին՝ Հանրային խորհրդի անդամների հետ հանդիպման ժամանակ կտրականապես դեմ հանդես եկավ այս գաղափարին:
Կարդացեք նաև
Երեկ ստորագրած հրամանագրով Ալիևը չի սահմանափակվել միայն շփման գծին հարող գոտու բնակիչներից կազմված կամավորական ջոկատների ստեղծման մասին որոշմամբ: Ադրբեջանի նախագահը նաև հրահանգել է երկրի կառավարությանը եռամսյա ժամկետում «Ռազմական դրության մասին» նոր օրենք մշակել` 1994 թվականից գործող օրենքի փոխարեն:
Բացի այդ Ալիևը հրահանգել է սեղմ ժամկետներում` ընդամենը մեկ ամսում, իրեն ներկայացնել միջոցառումների ցանկը, որոնց իրագործման դեպքում հնարավոր կլինի խստացնել այն անձանց պատիժը, ովքեր ռազմական ոլորտում պետական գաղտնիք պարունակող տեղեկություններ կհրապարակեն:
«Անհրաժեշտ է միջոցներ ձեռնարկել զանգվածային լրատվամիջոցներում և սոցիալական ցանցերում հատուկ պաշտպանական նշանակություն ունեցող օբյեկտների, ինչպես նաև զորամասերի ստրատեգիական, օպերատիվ և զորահավաքային տեղակայման մասին տեղեկությունների տարածումը կանխելու, զինված ուժերի ստորաբաժանումների կազմակերպական կառուցվածքի և անձնակազմի թվաքանակի մասին տեղեկությունները հրապարակելու ուղղությամբ»,- նշված է Ալիևի հրամանագրում:
Գեւորգ ՍՏԱՄԲՈԼՑՅԱՆ
Հրապարակումն ամբողջությամբ՝ սկզբնաղբյուր կայքում
