Տոնական սեղաններին շատ գեղեցիկ է նայվում տավարի մսից պատրաստված համեղ ռուլետը, որի լցոնները կարող են լինել շատ բազմազան: Ընդ որում, այս խորտիկը համեղ է ինչպես տաք վիճակում, այնպես էլ սառը:
Պատրաստման եղանակը
Վերցնել տավարի փափուկ մսի մեծ կտոր, ցանկալի է սուկի կամ մեջքի ֆիլե: Այն կարող է լինել 1-2 կգ քաշով: Միսը սուր եւ մեծ դանակով բացել, դարձնել տափակ ուղղանկյուն կտոր, որ փռվի տախտակի երկայնքով: Միսը ծեծելը ամենեւին պարտադիր չէ, սակայն՝ եթե ցանկանում եք, կարող եք մի փոքր թակել, որ ավելի լայն տարածվի: Ես, օրինակ, այդ պահը բաց եմ թողնում:
Կարդացեք նաև
Մսի վրա աղ եւ պղպեղ անել, ամբողջ մակերեսով քսել մանանեխ, լցնել միջուկը, փաթաթել, կապել հաստ թելով մի քանի տեղից: Վրան նույնպես աղ եւ պղպեղ անել, մանանեխ քսել: Ի դեպ, ցանկալի է մանանեխը լինի ոչ հայկական: Եթե գտնեք գերմանական կամ դիժոնյան՝ շատ ավելի լավ, եթե ոչ, գոնե որեւէ դեղին, ռուսական մանանեխ: Մեր տեղական մանանեխը չափազանց սուր համ ունի, հարմար չէ այս բաղադրատոմսի համար:
Լցոնը կարող է լինել շատ տարբեր: Օրինակ՝ մանր կտրատած եւ սոխեռածով տապակած սունկ: Կամ՝ սոխեռածով տապակած աղացած միս եւ պանիր, կամ՝ ապխտած միս եւ բեկոն: Կամ՝ ինչպես այս նկարներում եք տեսնում՝ պեստո սոուս, որն իրենից ներկայացնում է մայրու ընկույզի, կանաչ ռեհանի, պարմեզան պանրի եւ զեյթունի ձեթի աղացած խառնուրդ: Կարելի է պատրաստել պեստոյի ավելի հասանելի տարբերակը՝ ընկույզն ու կանաչին աղալ սխտորի հետ, ավելացնել մի քիչ մանանեխ, քերած դեղին պանիր: Կարելի է նաեւ տապակած սպանախ+ընկույզ+պանիր տարբերակով լցոնել: Մի խոսքով՝ «զոռ տվեք» ձեր երեւակայությանը: Ի վերջո, կարելի է ընդամենը աղ, պղպեղ եւ մանանեխով բավարարվել:
Ամեն դեպքում, անկախ նրանից, թե ինչ կլինի լցոնը, դրա մեջ մի քիչ պանիրը ցանկալի է, որպեսզի պատրաստի միսը կտրատելիս՝ լցոնը չթափվի, պանիրը սոսնձող դեր է խաղում: Եթե պեստոյով եք լցոնում, այդ նույն պեստոյից կարող եք նաեւ մսակտորի վրա քսել: Կարող եք նաեւ բեկոնի կտորներով «փաթաթել» մսակտորը, ապա նոր կապել, դա բավականին գեղեցիկ տեսք եւ յուրահատուկ համ կտա ձեր ռուլետին:
Լցոնած ռուլետը դրեք ֆոլգայի (փայլաթիթեղի) մեջ, լավ փաթաթեք, եւ դրեք արդեն 220-250 աստիճան տաքացրած ջեռոցը: Կես ժամից ստուգեք մսի պատրաստվածության աստիճանը: Ատամի փայտիկով ծակեք միսը, եթե արնաջուր դուրս չի գալիս, ուրեմն բավականին եփված է: Ֆոլգան բացեք, թողեք մի տաս-տասնհինգ րոպե էլ բաց վիճակում տապակվի, որ կարմրի: Եթե չեք ուզում շատ կարմրի՝ կարող եք այդ պահը բաց թողնել: Ընթացքում կարող եք ֆոլգայի մեջ կուտակված մսի հյութից լցնել ռուլետի վրա:
Երբ վերջնականապես պատրաստ կլինի, հանեք ջեռոցից, թողեք տաս րոպե հանգստանա, նոր կտրեք:
Բարի ախորժակ:
