Այսօր կառաջարկեմ դդումով մուրաբայի բուրավետ եւ շատ համեղ տարբերակ: Այն ձմռան ցուրտ երեկոներին կջերմացնի ձեզ՝ մի բաժակ տաք թեյի հետ:
Անհրաժեշտ մթերքները
2 կգ կտրատած եւ կիր դրած դդում (այս օրերին մուրաբա եփելու համար պատրաստ դդում վաճառվում է գրեթե բոլոր սուպերմարկետներում, շուկաներում)
2 կգ շաքարավազ
600 գ ջուր
1 նարինջ
1 կիտրոն (կարելի է վերցնել կես կանաչ եւ կես դեղին կիտրոն)
100 գրամ թարմ կոճապղպեղ
Կարդացեք նաև
Պատրաստման եղանակը
Դդումի կտորները լավ լվանալ տաք ջրով, վրան լցնել եռացրած ջուր, թողնել ջրի մեջ կես ժամի չափ:
Շաքարավազն ու ջուրը խառնել, դնել կրակին: Թողնել 10 րոպե եփվի, ավելացնել կտրատած ցիտրուսներն ու կոճապղպեղը: Երբ կրկին կսկսի եփվել, ավելացնել դդումի կտորները: Պարբերաբար տակնուվրա անել, որպեսզի դդումի կտորները հավասարաչափ եփվեն: 15 րոպեից անջատել: Երբ լրիվ սառած լինի՝ մի քանի ժամ հետո, կրկին դնել կրակին, թողնել կրկին 15-20 րոպե եփվի, էլի անջատել, թողնել սառչի: Անել նույն գործողությունը երրորդ անգամ: Ստուգել մուրաբայի պատրաստ լինելը՝ մի կաթիլ օշարակ կաթեցնելով սուրճի ափսեի մեջ, հենց սառչի, մատով կաթիլը բաժանել երկու մասի, եթե առանձին մնա, ուրեմն պատրաստ է: Եթե ոչ՝ մեկ անգամ եւս կրկնել վերը նշված գործողությունը: Երբ պատրաստ լինի՝ կրակից չհանելով՝ լցնել լավ լվացված եւ չորացրած ապակե տարաների մեջ եւ ամուր փակել:
Բարի ախորժակ:
Պատրաստեց
ՄԵԼԱՆՅԱ ԲԱՐՍԵՂՅԱՆԸ
«Առավոտ»
15.11.2014
