ԱԺ-ում շարունակվում է Հեռուստատեսության եւ ռադիոյի ազգային հանձնաժողովի 2014-ի գործունեության մասին հաղորդումը:
ՀԱԿ խմբակցության պատգամավորները՝ Արամ Մանուկյանը եւ Լեւոն Զուրաբյանը, ՀՌԱՀ նախագահ Գագիկ Բունիաթյանին դժգոհեցին, որ ընդդիմությունը լավ չի ներկայացվում Հանրային հեռուստաընկերությամբ: Գագիկ Բունիաթյանը հերքեց. «Պարոն Մանուկյան, ես 3 տարի ղեկավարել եմ Հանրային հեռուստաընկերությունը, դուք լավ ներկայացված եք եղել»:
Արամ Մանուկյանը պնդեց՝ ոչ 2013-ին, ոչ 2014-ին բացարձակ հրավեր չի եղել մեր ամբողջ խմբակցությունից: Նրա խոսքերով՝ «Ոչ թե Հանրային հեռուստատեսություն է, այլ ընդամենը Հանրապետականի հեռուստատեսություն է»:
Լեւոն Զուրաբյանը հարցրեց. «Մինչեւ 2008-ը Հայաստանն ունեցել է 21 անալոգային դիապազոն: Դրանից հետո ITU-ի որոշմամբ՝ Հայաստանին վերապահվել է ընդամենը 7 անալոգային հաճախականություն: Ո՞նց են ՀՀ իրավունքները ոտնահարվել, Հայաստանը զիջել է: Այդ 7-ից 3-ը թվայնացրել եք, հիմա ամեն մի անալոգային հաճախականության վրա միացվել է 6 թվային հաճախականություն, ընդհանուր թվով՝ 18 թվային հաճախականություն օգտագործվում է: Ի՞նչն է խանգարում, որ նաեւ 4-րդ անալոգային հաճախականություն թվայնացնեք, ինչը հնարավորություն կտա եւս 6 թվային հաճախականություն ունենալ: Դա կլուծի Հայաստանում բազմակարծության ապահովման խնդիրը, բոլորը գոհ կլինեն: Մրցութային սահմանափակումների կարիք չի լինի, որովհետեւ այդ մրցույթները դարձել են քաղաքական գործիք՝ սահմանափակելու այլ քաղաքական ուժերի հնարավորությունները՝ երեւալ եթերում: Օրինակի համար, ՀՀԿ-ի հետ ասոցացվում է մոտ 15 կանալ, ԲՀԿ-ն, ՀՅԴ-ն ու ՕԵԿ-ը ամեն մեկը մեկ կանալ ունի: Չհասկացանք, մենակ ՀԱԿ-ն ու «Ժառանգությո՞ւնն» են, որ այս պատկերից պետք է դուրս մնան: Մենք էլ ենք ցանկանում ազատ հասանելի լինենք մեր հանրությանը, եւ ոչ թե ստիպված լինենք հանրահավաքներով մեր ճշմարտությունը հասցնենք ժողովրդին: Հանրահավաքներն էլ չենք կարողանում իրազեկել: Օրինակ, մարտի 1-ին հանրահավաք ունենք, եթե ունենայինք սեփական հեռուստատեսություն, կիրազեկեինք»:
Կարդացեք նաև
Գագիկ Բունիաթյանը պատասխանեց, որ թվային հաճախականության բաժանումն իրենց հետ կապ չունի, Կապի նախարարության խնդիրն է: Ինչ վերաբերում է հեռուստաընկերությունների կուսակցականացմանը՝ նա վստահեցրեց. «Ոչ մի կուսակցություն հեռուստաալիք չունի: Որ նշեցիք 15-ը սենց, նենց, ունենք 18 հեռուստաընկերություն՝ չհաշված մարզայինները: Կուսակցությունները չունեն ալիք, կուսակցական ալիք չկա»:
Լեւոն Զուրաբյանը հստակեցրեց, որ քաղաքական վերահսկողություն ունեն կուսակցություններն այդ ալիքների վրա. «Մենք չունենք, չենք կարողանում իրազեկել»:
Լեւոն Զուրաբյանը վստահեցրեց, որ մարտի 1-ի հանրահավաքի լուրն ուղարկելու են, թող հանձնաժողովի միջամտությամբ հեռուստաընկերություններն իրազեկեն այդ մասին քաղաքացիներին:
Հռիփսիմե ՋԵԲԵՋՅԱՆ
