«Իրատես de facto»-ի հյուրն է «Հանրապետություն» կուսակցության նախագահ Արամ Սարգսյանը
– ՀՀԿ ԳՄ նիստում հնչած ելույթից հետո սկսվեց քաղաքական դաշտի շաբաթօրյակը, այդպես չէ՞։
– Քաղաքական ու քաղաքագիտական վերլուծությունները կթողնեմ այն մարդկանց, ովքեր սիրում են վերլուծություններ անել, երբ այլևս անելիք չունեն։ Ես կարծում եմ, որ փետրվարի 12-ից Հայաստանի ներքաղաքական կյանքում սկսված իրադարձությունները վաղուց հասունացել էին, բնական էր, որ հանգուցալուծումը չէր կարող շատ ուշանալ։ Քանիցս ասել եմ, որ ՀՀԿ-ի ու ԲՀԿ-ի միջև նմանություններն ավելի շատ են, քան տարբերությունները իրենց ողջ պատմության մեջ, առավել ևս, որ երկուսն էլ իրենց հաղթանակների ու պարտությունների համար ծնրադրում են Մոսկվայում և այնտեղ են տեսնում երկրի հետ կապված բոլոր խնդիրների լուծումը։ Պահը հասել էր, որ պարզվի՝ որ կուսակցությունն է գերակա։ ԲՀԿ-ն ուզում էր ցույց տալ, թե ինքն ավելի մոտ է Մոսկվայի դռանը, և այդ դուռն իր առաջ կբացվի նաև ապագայում, ինքն ավելի մոտ է Հայաստանի ժողովրդին և ավելի լավ կարող է գործողություններին ուղղություն տալ, քան ՀՀԿ-ն։ Հետևեց հայտնի հանգուցալուծումը, որը, խորապես համոզված եմ, Հայաստանի հասարակության շահերի հետ որևէ կապ չուներ։ Սա ընթացք է, երբ ջրերը պիտի զուլալվեն։
– Քաղաքական ուժերի վերադասավորումն ավարտվե՞ց, թե՞ նոր անակնկալներ են լինելու։ Եթե ԲՀԿ-ն իբրև ոչիշխանական՝ քաղաքական դաշտից դուրս է գալիս, ո՞վ է մնում։
Կարդացեք նաև
– Վերջնական գնահատականների ժամանակը դեռ չի եկել, ջրերը դեռ չեն զուլալվել։ Որ արհեստականորեն ստեղծված կազմակերպությունը, որին ժամանակին կուսակցություն էին անվանում և կոալիցիոն դաշնագիր էին ստորագրում, մի մարդու հարստության հիմքով ձևավորված կառույց էր ու սպասարկում էր մի քանի մարդու անձնական շահերին և ուղղորդվում էր նրանց կողմից, ընդունում է նաև ՀՀԿ-ն։ Զարմանալին ավելի շատ Սերժ Սարգսյանի անկեղծանալն էր, իրեն բնորոշ չէ՝ մարդկանց մասին ասել ինչ մտածում է։ Թե Սերժ Սարգսյանի անկեղծությունը, թե Գագիկ Ծառուկյանի անկեղծությունն աշխատեցին հօգուտ հասարակության, մեկ անգամ գոնե հրապարակավ ասվեց ով ով է, ով ում ինչ է համարում։ Ես չեմ կարծում, որ ներկայացումն ավարտված է, գործընթացը շարունակվում է։
Անահիտ ԱԴԱՄՅԱՆԻ
Հարցազրույցն ամբողջությամբ կարող եք կարդալ «Իրատես de facto» թերթի այսօրվա համարում
