Կանայք իրենց տոնի առիթով անվճար կհետազոտվեն եւ կվիրահատվեն: Այսօր այս մասին ասաց Երեւանի քաղաքապետարանի առողջապահության վարչության պետ Կամսար Բաբինյանը` առողջական խնդիրներ ունեցող քաղաքացիներին կոչ անելով դիմել տեղամասային պոլիկլինիկաներ` հերթագրվելու:
Պարոն Բաբինյանն ասաց, որ անցյալ տարի 26 հազարից ավելի քաղաքացի է դիմել ակցիայի շրջանակներում, որից 1936-ը անվճար բուժօգնություն են ստացել: Կամսար Բաբինյանն ասաց, որ ամենաշատը վիրահատվել են աչքի գանգատներ ունեցող քաղաքացիները:
Aravot.am-ի հարցին, թե ակցիան անվճար է, բայց որոշ քաղաքացիներ դժգոհություն են հայտնում, որ միեւնույն է բժիշկները հավելյալ գումար են ուզում, Կամսար Բաբինյանն ասաց, որ, եթե նման դեպք լինի, ապա քաղաքացիներն ահազանգեն քաղաքապետարանի «թեժ գծին» եւ նա անձամբ կգնա բողոքի հետքերով:
Ակցիան տեւելու է մարտի 8-ից ապրիլի 7-ը: Սակայն, եթե քաղաքացիները հերթագրված լինեն, բայց նշյալ ժամանակահատվածում դեռեւս նրանց հերթը հասած չլինի, Կամսար Բաբինյանն ասաց, որ ապրիլի 7-ից հետո էլ նրանք կստանան բուժօգնությունը:
Հարցին, թե քաղաքացին կարո՞ղ է ընտրել, թե որ բուժհիմնարկում բուժվի եւ որ բժշկի մոտ, պարոն Բաբինյանն ասաց, որ ակցիայի վերաբերյալ կանոնակարգը բոլոր պոլիկլինիկաները ստացել են եւ նրանք քաղաքացիներին կտրամադրեն հիվանդանոցների ցանկը, որոնց հետ քաղաքապետարանը համագործակցում է. «Բժիշկն է որոշում ինչ վիրահատություն եւ ինչ ծավալի վիրահատություն կատարի: Այո հիվանդը կարող է ընտրել իր բժշկին, բայց այն հիվանդանոցում, որի հետ քաղաքապետարանը պայմանավորվածություն ունի»:
Վարչության պետը նաեւ ասաց, որ պոլիկլինիկաները համալրվել են ժամանակակից բուժսարքավորումներով, որպեսզի մարդկանց ավելի որակյալ բուժծառայություն մատուցեն:
Լուսինե ԲՈՒԴԱՂՅԱՆ
