Հիմնադիր խորհրդարանի պատգամավոր Աշոտ Պետրոսյանը մարտի 30-ին դիմել էր Սեւան քաղաքի ոստիկանության բաժանմունք:
Նա Aravot.am-ի հետ զրույցում ասաց, որ մարտի 26-ին իր հարեւանները տեղեկացրել են, որ Լճաշեն գյուղում գտնվող՝ իր սեփականությունը հանդիսացող տան վրա փակցված պաստառը պատռել են: Պաստառը փակցվել է մարտի 18-ին, այդ տանը Հիմնադիր խորհրդարանը պատրաստում է գրասենյակ բացել:
«Մոտ մեկ շաբաթ հետո ոստիկանները սկսել են հետաքրքրվել, թե ի՞նչ պաստառ է, արդյոք գրասենյակ է բացվելո՞ւ: Չնայած նրան, որ պաստառի վրա ամեն ինչ գրված է, իրենք որոնումներ էին անում: Փորձել են հետաքրքրվել, թե ո՞ւմ բնակարանն է, անգամ պարզել են, որ եղբայրս քաղբանտարկյալ է, հորեղբորս տղային են փնտրել, որն աշխատում է Լճաշենից 10 կմ հեռավորության վրա: Դրանից հետո գյուղի թաղայինի հետ եմ խոսել, պարզվեց, որ ինքն ընդամենը ուզում է իմանալ, թե ինչո՞ւ է գրասենյակը բացվելու, պաստառը ինչի մասին է: Գյուղի թաղայինը առանձնապես ոչինչ չասաց: Դրանից երկու օր հետո իմացա, որ պաստառը պատռված է »,- ասաց նա:
Կարդացեք նաև
Աշոտ Պետրոսյանի պնդմամբ՝ պաստառը պոկելով իրեն ե՛ւ ֆինանսական, ե՛ւ բարոյական վնաս են պատճառել: Ըստ նրա՝ վնասի չափը կազմում է մոտավորապես 50 հազար դրամ:
Սեւանի ոստիկանության բաժանմունքում նա հանդիպել է քրեականի պետ Կարեն Խաչատրյանին: Վերջինս հայտնել է, որ ոստիկանապետը տեղում չէ եւ երկու-երեք օր հետո նոր կիմանա, թե ինչպես կարող է հանցագործներին հայտնաբերել:
Աշոտ Պետրոսյանը կատարվածի մեջ քաղաքական ենթատեքստ է տեսնում. «Ուղղվածություն, ձեռագիր տեսնում եմ: Կարծում եմ՝ 3 օր հետո ամեն ինչ պարզ կլինի Հիմա պարզ է, բայց այդ ժամանակ ավելի կոնկրետ հայտարարություն կարելի է անել»:
Ամի ՉԻՉԱԿՅԱՆ
Ինչքան հալածեն «Հիմնադիր խորհրդարանին»,այնքան վերջինիս փառքը մեծանալու է:
Միակ ուժը, որն ինչ որ բան գոնե փորձում է անել՝ երկիրը փրկելու համար: