Գյումրու մանկավարժական ինստիտուտի ռեկտորի եղբոր կինը՝ Նելլի Օհանյանը, որի ամուսնուն՝ 50-ամյա Հարություն Գրիգորյանին սպանել էին անցած տարվա հուլիսի 24-ին Շիրակի մարզի Գետք գյուղի քանդված գոմերի մոտ, վրդովված է , որ սպանության մեջ մեղադրվող Արման Կատունյանին ազատ են արձակել: Ոչ միայն փոխել են նրա խափանման միջոցը, ստորագրություն են վերցրել երկրից չհեռանալու մասին, այլ վերաորակավորել են նրան առաջադրված մեղադրանքը:
ՀՀ Քրեական օրենսգրքի 104 հոդված 1-ին մասի հատկանշներով առաջադրված մեղադրանքը օրերս փոխվել է. նրան մեղադրանք է առաջադրվել ՀՀ Քրեական օրենսգրքի 105 հոդվածի հատկանիշներով: Այսինքն` դիտավորյալ սպանությունը վերորակավորվել է որպես հոգեբանական աֆեկտի, «Հոգեկան խիստ հուզմունքի վիճակում կատարված սպանություն»: Հիշեցնենք, որ Արման Կատունյանը ռազմական ոստիկանության քրեական հետախուզության Գյումրու բաժանմունքի պետն էր:
Նելլի Օհանյանը, բաց նամակ է հղել Aravot.am-ին, որը ուղղված է ՀՀ Գլխավոր դատախազ Գևորգ Կոստանյանին ու ՀՀ Քննչական կոմիտեի նախագահ Աղվան Հովսեփյանին: Նամակը ներկայացնում ենք ստորև
Հարգելի պարոն գլխավոր դատախազ,
Կարդացեք նաև
Հարգելի պարոն ՔԿ նախագահ,
Դիմում եմ Ձեզ որպես պետական այրերի, ում մեր երկրի Սահմանադրությունը վերապահել է կարևոր դերակատարություն քաղաքացիների իրավական պաշտպանության, ապահովման գործում: Ուզում եմ հավատալ, որ Դուք անհաշտ թշնամին եք Ձեր ոլորտներում ամեն տեսակ կամայականությունների ու զոռբայությունների, ծանոթ-բարեկամական կապերի ու միջնորդությունների, անօրինությունների ու անարդարությունների: Այդ պատճառով էլ հույս ունեմ, որ կարձագանքեք իմ ցավին, կօգնեք, որ վերականգնվի արդարությունն ու ճշմարտությունը, որն անխղճորեն ոտնատակ է արվում հենց իրավապահ մարմինների կողմից:
Յոթ ամիս առաջ Գյումրու զինվորական ոստիկանության աշխատակցի` Արման Կատունյանի արձակած կրակոցներից դաժանորեն սպանվեց ամուսինս` Հարություն Գրիգորյանը` թողնելով մեզ անսահման վշտի ու ծանր հոգեվիճակի մեջ: Դիտավորյալ սպանության փաստն ակնհայտ էր. մարդասպանը հոգացել էր քաղաքից հեռացնել իր կնոջն ու երեխաներին, որոշել իր փախուստի ճանապարհը, զինվել ապօրինի զենքով /ոչ իր տաբելային/, զանգահարել ամուսնուս, կանչել հանդիպման, նրան հանիրավի մեղադրել իր կնոջը հետապնդելու մեջ, անողոքաբար սպանել բազմաթիվ կրակոցներով ու թողնելով ամայի վայրում` դիմել փախուստի: Սակայն Թուրքիա ընկնել չէր հասցրել, որովհետև մեր իրավապահների օպերատիվ գործողությունների շնորհիվ շուտով ձերբակալվել էր:
Մեզ համակած ծանրագույն վշտի մեջ չհասկացանք, թե ինչպես շատ արագ ձերբակալությունը վերաձևակերպվեց, իբր թե մարդասպանը հանձնվել էր իր կամքով, ապա սպանության պատճառ համարվեց իբր թե ամուսնուս կողմից նրա կնոջն հետապնդելը, մինչդեռ բազմաթիվ փաստեր վկայում են հակառակը՝ նրանց փոխադարձ մտերմությունը:
Բոլորովին վերջերս տեղի ունեցավ ամենամեծ աչքակապությունը. քննիչների ջանքերով դիտավորյալ սպանության մեղադրանքը հանվեց, վերաորակավորվեց իբրև աֆեկտի ազդեցության տակ կատարված արարք, և ընդամենը յոթ ամիս կալանավայրում անցկացրած մարդասպանը հանրապետությունից չբացակայելու ստորագրությամբ օրերս ազատվեց կալանքից: Միանգամայն հասկանալի է, որ այս բոլոր անօրինությունների տրամաբանական ավարտը կլինի արդար պատժից նրա լիովին խուսափելը, ինչը հաջողությամբ սարքվում է:
Ես անողոք ու դաժան պատժի կողմնակից չեմ, ես արդարացի պատիժն եմ ուզում այն մարդու, որը դիտավորյալ ուրիշի կյանք է խլել, մի ողջ ընտանիք թողել ծանր վշտի ու անորոշության մեջ: Հավատացած եմ, որ ոստիկանության աշխատակիցը կարող էր իր կնոջն իբր թե չորս տարի անընդհատ անհանգստացնող ամուսնուս «ոտնձգությունները» հեշտորեն կանխել հենց իրավապահ մարմինների օգնությամբ, օրինական և ո’չ թե ծանր հանցագործության ճանապարհով` այն էլ` ապօրինի զենքի գործադրմամբ: Ուրեմն հույս է ունեցել, որ թեթև կպրծնի: Ու հիմա ակնհայտ է դառնում, որ նրան իրոք օգնում են շատ թեթև պրծնել կատարվածից:
Հարգելի պարոներ, Դուք փորձառու իրավաբաններ եք, ես հավատում եմ Ձեր արդարամտությանը: Կատարվածը բացառապես դիտավորյալ սպանություն է, այն աֆեկտի տակ կլիներ, եթե Կատունյանը ամուսնուս իր կնոջ հետ պատահաբար բռնացներ իր ննջարանում, իր անկողնու մեջ կամ այլ վայրում: Մինչդեռ նա տարիներ շարունակ իմացել է նրանց փոխադարձ մտերմության /ոչ ամուսնուս հետապնդումների/ մասին, իսկ թաղում, որտեղ ապրում են մեր երկու ընտանիքները, բոլորը գիտեն Կաթունյանի կնոջ վարքը: Ինչ աֆեկտի մասին է խոսքը:
Ես զինվորի մայր եմ, որի սիրելի հորը գազանաբար սպանել է ոչ թուրքը, այլ իր հավատակիցը: Որդիս թշնամուց այսօր պաշտպանում է սահմանները հայրենիքի, որտեղ արդեն վաղը ազատ ու անպատիժ ման է գալու նրա հոր կյանքն այնքան վայրագորեն խլած մարդասպանը: Սա՞ է արդարությունը:
Հարգարժան ղեկավար այրեր, ես հայցում եմ գործին Ձեր արդարացի միջամտությունը` որը կկանխի կատարվող անօրինությունը, ու մարդասպանը ոչ թե կշրջի ազատության մեջ, այլ կստանա արժանի պատիժ:
Հավատով, որ կհաղթի օրինականությունը՝
սպանվածի այրի Նելլի Օհանյան
