«Մենք նախատեսել ենք նախընտրական քարոզարշավի ընթացքում լինել Լեռնային Ղարաբաղի բոլոր գյուղերում»,- Aravot.am-ի հետ զրույցում ասաց Արցախի ժողովրդավարական կուսակցության անդամ, ԼՂՀ ԱԺ պատգամավոր Վարդգես Բաղրյանը:
Նա նշեց, որ Արցախի ժողովրդավարական կուսակցության համար թիվ մեկ խնդիրը Լեռնային Ղարաբաղի անվտանգությունն է. «Մենք միշտ պետք է հիշենք, որ մայիսի 3-ին կյանքը չի ավարտվում: Ընտրություններից հետո պետք է ավելի ուժեղ լինել, ոչ թե փորձենք մասնատել, խրամատների վերածել երկիրը, դա անթույլատրելի է: Մենք մեր նախընտրական ծրագրում երկրին հուզող հարցերը ընդգրկել ենք, բայց մեզ համար առաջնահերթություն է մնում երկրի անվտանգությունը եւ ժողովրդավարության էլ ավելի խորացումը»՚:
Նրա խոսքերով՝ նախընտրական մթնոլորտը Ղարաբաղում բավականին հանգիստ է, եւ որեւէ խախտում դեռ չեն նկատել. «Այսօր նախընտրական քարոզարշավի 8-րդ օրն է, որեւէ արտառոց դեպք, բարեբախտաբար, չի գրանցվել»:
«Ազգային վերածնունդ» եւ «Շարժում 88» կուսակցությունները հայտարարել էին, որ Լեռնային Ղարաբաղի իշխանությունները իրենց վարչական լծակներն են օգտագործում: Վարդգես Բաղրյանից հետաքրքրվեցինք, թե ինչպե՞ս կմեկնաբանի այդ հայտարարությունները, նա ասաց. «Եթե նրանք այդ փաստերն ունեն, լավ կլիներ, որ ասեին, թե կոնկրետ, որ քաղաքական ուժն է օգտագործում այդ լծակը: Թե չէ ընդհանուր ասելու դեպքում բոլորի վրա էլ կարող է կասկած ընկնել. Եթե ա-ն ասվում է, բ-ն էլ պետք է ասել»:
Կարդացեք նաև
Լեռնային Ղարաբաղում խորհրդարանական ընտրությունները տեղի կունենան մայիսի 3-ին:
Ամի ՉԻՉԱԿՅԱՆ
