Ներկայացնում ենք Անդրիաս Ղուկասյանի ֆեյսբուքյան գրառումը. «Ժիրայր Սեֆիլյանի և նրա համախոհների ձերբակալությունը անհիմն է և անօրինական: Այս հերթական ռեպրեսիան վկայում է, որ պետության բարձրագույն ղեկավար պաշտոնյաների կողմից Հայաստանում իրականացվող սահմանադրական կարգի տապալումը կայուն և անշրջելի բնույթ է կրում:
Ստեղծված իրավիճակում ես գտնում եմ, որ Պավել Մանուկյանի հացադուլ հայտարարելու որոշումը ճիշտ քաղաքական քայլ է: Իմ կարծիքով, Հիմնադիր Խորհրդարանը պետք է օգտագործի այդ բողոքի ձևը:
Ճիշտ կլինի, եթե ապրիլի 10-ից (երբ լրանում է սահմանադրությամբ սահմանված 72 ժամյա մեղադրանք ներկայացնելու ժամկետը) Հիմնադիր Խորհրդարանի առնվազն երեք անդամ սկսեն հացադուլ, բոլորի համար տեսանելի վայրում՝ պահանջելով բոլոր քաղբանտարկյալների ազատումը: Ապրիլի 12-ին հացադուլին պետք է միանան ևս երեք հոգի և այդպես շարունակ: Հիմնադիր Խորհրդարանի համախոհները արտասահմանում նույնպես պետք է սկսեն հացադուլներ Հայաստանի Հանրապետության դեսպանատների դիմաց:
Ցանկալի է, որ մինչև ապրիլի 24-ը, Հայաստանում և սփյուռքում հացադուլ անողների թիվը հասնի հարյուրի: Այդ դեպքում քաղաքական բողոքի ակցիան կունենա միջազգային հնչեղություն և կդառնա անհրաժեշտ ճնշման գործիք քաղբանտարկյալների ազատման համար:
Կարդացեք նաև
Բնական է, որ ակցիան պետք է ներառի ոչ միայն Հիմնադիր Խորհրդարանի անդամներին և նրանց համախոհներին, այլ նաև բոլոր այն քաղաքական գործիչներին, ով չի հանդուրժում Հայաստանում սահմանադրական կարգի տապալումը և պայքարում է դրա դեմ:
Ես ինքս պատրաստ եմ միանալ նման բողոքին, և կուզենայի մասնակիցների թվում տեսնել նաև Ազգային Ժողովում ընդդիմությունը ներկայացնող պատգամավորներին»:
