Կարդացինք «ԱԺ պատգամավորը 3 մլն 600 հազար դրամ է պահանջում «Կամազի» վարորդից» վերնագրով տեղեկատվությունը, որն էականորեն կշահեր, եթե խզված չլիներ պատճառահետևանքային կապը և նյութը զերծ լիներ անճշտություններից: Իսկ այս ամենի պատճառը, մեր գնահատմամբ, գործով ամբաստանվող Մանվել Վարդանյանի փաստաբան Լիանա Բալյանի ընտրած մարտավարությունն է, որը կառուցված է «լավագույն պաշտպանությունը հարձակումն է» սկզբունքի վրա:
Ջանալով հնարավորինս արդարացնել պատվիրատուի սպասելիքները և նրանից ստացած հոնորարները, առաջին իսկ օրերից փաստաբանը հարձակումների շարք սկսեց «Տրանս Ակնթարթի» և «Գազելի» հանգուցյալ վարորդի դեմ, իր ելույթներին առավել «գրավչություն» տալու նպատակով սկսեց պատեհ-անպատեհ հոլովել տրանսպորտային ընկերության բաժնետերերից ԱԺ պատգամավոր Մարտուն Գրիգորյանի անունը, թվում է, իսպառ մոռանալով, որ միայն ու միայն, ինչպես եզրակացրել է նախաքննության մարմինը, իր պաշտպանյալի գործողությունների արդյունքում է, որ կան 7 անմեղ զոհեր և 7 վիրավորներ: Ի դեպ, աղետի օրվանից «Տրանս Ակնթարթ» ընկերությունը և Մարտուն Գրիգորյանը եղել են զոհերի և վիրավորների ընտանիքների կողքին ու բոլոր հնարավորություններն օգտագործել նրանց հոգսերը թեթևացնելու համար:
Նյութական վնասի հատուցման մասին: Ես լավ եմ հասկանում թե՛ այսօրինակ նեղության մեջ հայտնված մարդու և թե նրա ընտանիքի վիճակը, և նյութական վնասի հատուցման պահանջ չէի դնի, եթե նրանց շահերը ներկայացնողն այսչափ ազատություն չտար իր լեզվին և հարկի-անհարկի հղումներ չաներ: Կարծում եմ, որ «Կամազի» վարորդն ու իր ընտանիքի անդամները պետք է մտահոգվեն պաշտպանի պահվածքով, որի արդյունքում «Տրանս Ակնթարթ» ընկերությունը որոշում կայացրեց արդարացիորեն պահանջել իրեն հասցված նյութական վնասի հատուցումը: Ի դեպ, «Տրանս Ակնթարթ» ընկերության կրած վնասը չափվում է ոչ միայն մեկ «Գազելի» շարքից դուրս գալով, այլև այն արձագանքով, որը լուրջ վնաս հասցրեց ընկերության գործարար համբավին: Այս ուղղությամբ հաշվարկներն էլ դեռևս չեն արվել: Պաշտպանի այս արարքները շարունակում են անվստահության և վախի մթնոլորտ ստեղծել ուղևորների մոտ:
Ըստ ամենայնի, փաստաբանը կայանալու խնդիր ունի և դա անում է բացարձակ անմեղ մարդկանց արյան գնով և շահարկումներով:
«Տրանս Ակնթարթ» ՍՊԸ տնօրեն Անահիտ Խալաթյան
