Վրաստանի վարչապետ Իրակլի Ղարիբաշվիլին այսօր նախարարների նոր թեկնածուների է ներկայացրել այդ երկրի նախագահ Գիորգի Մարգվելաշվիլիին: «Новости-Грузия»-ի փոխանցմամբ՝ Վրաստանի խորհրդարանը նոր կառավարությանը վստահության քվե պետք է տա:
Հիշեցնենք, որ ապրիլի 29-ին հրաժարական էր ներկայացրել Վրաստանի կառավարության 7-րդ անդամը՝ սպորտի եւ երիտասարդության հարցերի նախարարը: Վրաստանի Սահմանադրության համաձայն՝ 20 անդամ ունեցող կառավարության մեկ երրորդի հրաժարականի դեպքում կառավարությունը հրաժարական է տալիս և առաջանում է խորհրդարանի կողմից նրան վստահություն հայտնելու անհրաժեշտություն:
Սպորտի եւ երիտասարդության հարցերի նախարարության պաշտոնի թեկնածու է առաջադրվել Տարիել Խիչակաշվիլին, Բնապահպանության նախարարի պաշտոնում՝ Գիգլա Ագուլաշվիլին, իսկ պաշտպանության նախարարի պաշտոնում Վրաստանի պատմության մեջ առաջին անգամ կին թեկնածու է առաջադրվել՝ Թինա Խիդաշելին: Հաղորդվում է, որ մնացած նախարարները կպահպանեն իրենց պաշտոնները:
«Журналисткая Правда»-ն էլ փոխանցում է, որ Վրաստանի նախագահ Գիորգի Մարգվելաշվիլին օգտվել է իր սահմանադրական իրավունքից եւ մեկ շաբաթով հետաձգել է կառավարության կազմի հաստատումը: Հատուկ ճեպազրույցի ժամանակ Մարգվելաշվիլինի լուրջ անհանգստություն է հայտնել Վրաստանի նախարարների կաբինետում տիրող իրավիճակի առնչությամբ:
Կարդացեք նաև
Նրա խոսքերով՝ վերջին օրերին նախարարների հաճախակի փոփոխությունը հանգեցնում է այն մտքին, որ կառավարություն ֆորս-մաժորային է: Նրան հատկապես անհանգստացնում է պաշտպանության նախարարի փոփոխությունը: Մարգվելաշվիլին վարչապետին եւ պատգամավորներին հանձնարարել է քննարկել, խորհրդակցել եւ որոշել կառավարության նոր կազմը:
Պատրաստեց Աշոտ ԻՍՐԱԵԼՅԱՆԸ
