Ինչպես տեղեկացրել էինք, ԲՀԿ-ն որոշել է կառավարության անդամների եւ այլ գերատեսչությունների ղեկավարների հետ՝ քննարկելու հասարակությանը հուզող խնդիրներ:
Այս մասին լրագրողների հետ զրույցում ԲՀԿ ղեկավար Նաիրա Զոհրաբյանն ասաց, որ շուտով հանդիպելու է Հանրային ծառայությունները կարգավորող հանձնաժողովի նախագահ Ռոբերտ Նազարյանի հետ. «Այսօր ամենահրատապ հարցերից է էլեկտրաէներգիայի սակագնի հնարավոր բարձրացումը: 2 օր առաջ ես նախնական պայմանավորվածություն եմ ձեռք բերել ՀԾԿՀ նախագահ Ռոբերտ Նազարյանի հետ»:
Ռոբերտ Նազարյանն ասել է, որ դեռ բանավոր է տեղեկացված ՀԷՑ-երի հայտի մասին, իսկ պաշտոնական հայտը դեռ չեն ստացել:
Նաիրա Զոհրաբյանն ասաց, որ կաշխատի առաջիկա օրերին Նազարյանը լինի հանձնաժողովում: ԲՀԿ-ն Նազարյանից փորձելու է ճշտել, թե հնարավոր բարձրացման մեջ որքան է կազմում սուբյեկտիվ եւ օբյեկտիվ հատվածը:
Կարդացեք նաև
Ռոբերտ Նազարյանից պարզելու են՝ մենեջմենթի խնդիր չկա՞, իրենք ունենում են նախատեսվածից ավելի շատ կորուստներ, ինչ-որ մեկը դրա համար պատասխան տալո՞ւ է, թե՞ ոչ. «Ինչո՞ւ է այնպես լինում, որ ամեն անգամ դրա համար պատասխան տալիս է ՀՀ քաղաքացին, որի վրա հերթական անգամ դրվում է բարձրացված սակագին: Սրանք հարցեր են, որոնք պետք է քննարկվեն հանձնաժողովի ղեկավար մարմնի հետ»:
Նաիրա Զոհրաբյանը տեղեկացրեց, որ հանդիպում են ունենալու նաեւ արդարադատության նախարարի հետ. «Մենք գիտենք, որ այդ համակարգում լրջագույն խնդիրներ ունենք դատական համակարգի, կոռուպցիայի հետ կապված, քրեակատարողական հիմնարկներում տիրող իրավիճակի հետ կապված»:
Հռիփսիմե ՋԵԲԵՋՅԱՆ
