Սխալ սնվելը հանգեցնում է մի շարք լուրջ խնդիրների: Այսօր այս մասին «Նոյյան տապան» ակումբում ասաց սննդաբան, էնդոկրինոլոգ Հասմիկ Աբովյանը: Նրա խոսքերով՝ մարդիկ երկար տարիներ սնվում են սխալ, հետո առողջական որեւէ խնդրով դիմում են բժշկի՝ առանց իմանալու, որ այդ հիվանդությունը սխալ սնվելու արդյունք է:
Բժշկուհու ներկայացմամբ՝ կարելի է ուտել այն, ինչ ուտելի է, սակայն կան սննդի տեսակներ, օրինակ՝ արագ սնունդը, որը կործանարար է: Էնդոկրինոլոգն ասաց, որ այսօր շատ սննդի օբյեկտներ, կլինեն դրանք սրճարաններ, ռեստորաններ, օգտագործում են այսպես կոչված տրանս-յուղեր, որը շատ մատչելի են բիզնեսի համար, միաժամանակ շատ կործանարար են:
Aravot.am-ի հարցին՝ ի՞նչ խորհուրդ կտա այն ընտանիքներին, որոնք չեն կարող էկոլոգիապես մաքուր եւ բազմազան սնունդ գնել, ինչպե՞ս կարելի է քիչ եկամուտով առողջ սնվել, շատերը գրեթե ամեն օր միայն կարտոֆիլ են ուտում, բժշկուհին ասաց. «Գիտեք, կարտոֆիլը մթերքների թագուհին է: Այն պատերազմների ժամանակ ազգեր է փրկել եւ ամենեւին էլ վատ չէ, որ մարդիկ կարտոֆիլ են ուտում: Ես հաճախ ասում եմ՝ կարեւորը այն չէ, ինչ ես ուտում, կարեւորն այն է՝ ինչպես ես պատրաստում»:
Մանրամասն՝ տեսանյութում
Կարդացեք նաև
Ասուլիսի մեկ այլ մասնակից՝ հոգեբան Նաիրա Վանյանն էլ ասաց, որ այսօր սովորաբար արագ սննդի կետերը ուտելիքը այնպիսի հավելումներով ու համեմունքներով են պատրաստում, որ այդ սնունդը դրդում է մարդկանց նորից ու նորից ուտել: Հոգեբանի կարծիքով՝ շատ կանայք սթրեսային վիճակում էլի դիմում են սննդին, սկսում են ուտել, ուտել, գիրանալ: Այսպիսի մարդիկ երբ հուզված են լինում սկսում են ուտել՝ կարծելով, որ կերան, մի քիչ հանգստացան, մինչդեռ դա սթրեսից ազատվելու միջոց չէ, արդյունքում պարզապես գիրանում են:
Բանախոսներն այն կարծիքին են, որ ճիշտ սնվելը պետք է դաստիարակել մանկապարտեզից:
Նելլի ԲԱԲԱՅԱՆ
