Հունիսի 17-ին ՀՀ ՏԿԱԻ նախարարի տեղակալ Հայկարամ Մխիթարյանն ընդունել է Համաշխարհային բանկի աղետների ռիսկի կառավարման մասնագետ Կո Տակեուչիին:
Հանդիպման նպատակն էր ՏԿԱԻՆ համապատասխան մասնագետների հետ քննարկել աղետների ռիսկերի կառավարման բնագավառում հետագա համագործակցության ուղղությունները և ներկայացնել նախորդ հանդիպումից հետո կատարված աշխատանքները:
Պարոն Տակեուչին շնորհակալություն հայտնեց ընդունելության և արդյունավետ համագործակցության համար` կարևորելով նման աշխատանքային հանդիպումները: Նա տեղեկացրեց, որ դրամաշնորհային ծրագրին մասնակցելու հայեցակարգային փաստաթուղթն արդեն ներկայացվել է պատասխանատուներին և հույս հայտնեց, որ մոտակա ամիսներին այն կհաստատվի: Ծրագիրը կուղղվի Հայաստանում աղետների կառավարման համակարգի հզորացմանը, աղետներին պատրաստվածության բարձրացմանը, աղետների ռիսկերի նվազեցման ֆինանսավորման ռազմավարության մշակմանը:
Հանդիպմանը Կո Տակեուչին նշեց, որ դրամաշնորհային ծրագրի շրջանակում առաջարկվում է նաև նոր բաղադրիչ՝ աջակցել ՀՀ կառավարությանն աղետների ռիսկերի կառավարման տեղեկատվական պլատֆորմի մշակման և ընդհանուր տեղեկատվական բազայի ստեղծման հարցերին, ինչը կնպաստի քաղաքային պլանավորմանը, աղետների ռիսկերի արդյունավետ կառավարմանը և աղետների դեպքում արագ արձագանքմանը:
Կարդացեք նաև
ՀՀ ՏԿԱԻՆ փոխնախարարը շնորհակալություն հայտնեց հյուրին` ակտիվ համագործակցության համար, և նշեց, որ դրամաշնորհային ծրագրում ընդգրկված ուղղություններն առաջնային են ՏԿԱԻ նախարարության համար: Միևնույն ժամանակ Հ. Մխիթարյանն ընդգծեց, որ կան այլ ուղղություններ, որոնցով ևս կարելի է ընդլայնել համագործակցությունը:
Քննարկման ընթացքում ՏԿԱԻՆ պատասխանատուները ներկայացրեցին իրենց դիտարկումները դրամաշնորհային ծրագրի շրջանակում առաջարկվող ուղղությունների, մասնավորապես՝ տեղեկատվական բազայի ստեղծման ու հետագա համագործակցության աշխատանքներն ավելի արդյունավետ իրականացնելու վերաբերյալ:
Հանդիպման ավարտին ՀԲ ներկայացուցիչը եղավ նաև Ճգնաժամային կառավարման ազգային կենտրոնում, որտեղ ծանոթացավ տեղեկատվական հոսքերի կառավարման ՏԿԱԻՆ հնարավորություններին:
ՀՀ ԱԻՆ
