Այսօր Կենտրոն և Նորք-Մարաշ վարչական շրջանների ընդհանուր իրավասության դատարանում քրեական աշխարհում հայտնի Թևոս Սաֆարյանի եղբոր Արթուր Սաֆարյանի սպանության գործով դատարան ներկայացած մեղադրյալ Տիգրան Ասատրյանը հրաժարվեց ցուցմունք տալ: Պնդեց իր նախաքննական ցուցմունքը:
Հիշեցնենք՝ 2014թ. հունվարի 27-ին անհայտ անձը Արամի նրբանցքի շենքերից մեկի մուտքի մոտ կրակել և սպանել էր 41-ամյա Արթուր Սաֆարյանին՝ քրեական հեղինակություն Թեւոսիկի եղբորը: Սպանության մեջ մեղադրվում է Իսրայել Սարգսյանը: Նրան մեղադրանք է առաջադրվել ՀՀ քրեական օրենսգրքի 38-104 հոդվածի 2-րդ մասի 8-րդ կետով (հանցագործության կազմակերպիչ, սպանություն` կատարված պատվերով) և 104-րդ հոդվածի 2-րդ մասի 11-րդ կետով (այլ հանցանքը թաքցնելու նպատակով կատարված սպանություն):
Ամբաստանյալ Իսրայել Սարգսյանը առաջարկեց հրապարակել Տիգրան Ասատրյանի ցուցմունքը՝ պարզաբանելով, որ ինքը բազմաթիվ հարցեր ունի նրան տալու. «Գործի մեխը սա է: Դատական գործընթացը գնում է, ու դատաքննության ընթացքում կերևա՝ այդ ապացուցողական գործընթացի ժամանակ ինչքանո՞վ է քննչական ապարատը աշխատանքներ տարել պրոֆեսիոնալ ձևով, ինչքանով է կարողանում ապացուցել տվյալ հանցագործությունը, որում մեղադրում են ինձ: Ընդհանրապես պիտի մեղադրող կողմն ապացուցի իմ հանցանքը, ոչ թե ես պիտի ապացուցեմ՝ չեմ կատարել այդ հանցանքը»:
Նրա խոսքով, մեղադրականի հիմքում դրված բոլոր ապացույցները ենթադրությունների դաշտից են. «Այդ ենթադրական մեղադրանքներն էլ կազմված են Տիգրան Ասատրյանի ցուցմունքների վրա: Այսինքն, Տիգրան Ասատրյանի տված ցուցմունքները վերցրել են կմախքի պես և վրան սկսել են հավաքել ինչ-որ մարմին, որը չի հավաքվում: Ինձ պետք է, որ տվյալ ցուցմունքները հրապարակվեն, որ հանրությունը, բոլորն իմանան, թե իրականությունն ինչ է, ու ես լիքը հարցեր ունեմ տալու: Եվ ես կուզենամ, որ ինքը պատասխանի այդ հարցերին»:
Կարդացեք նաև
Տիգրան Ասատրյանի նախաքննական ցուցմունքները հրապարակվեցին: Հարցաքննություններից մեկի ժամանակ մեղադրյալը պատմել էր, որ Արթուր Սաֆարյանի հետ ջերմ հարաբերությունների մեջ է եղել, դեպքի օրը Սաֆարյանի հեռախոսահամարի զանգից է իմացել կատարվածը, Սաֆարյանի կինն է իրեն պատմել՝ ինչ է տեղի ունեցել ու մինչեւ ինքը հասել է հիվանդանոց, Արթուր Սաֆարյանն արդեն մահացած է եղել:
Նա պատմել էր նաեւ ձայնագրության մասին, թե ինչպես է իր տանը Իսրայել Սարգսյանին ձայնագրել դեպքի հետ կապված զրույցի ժամանակ; ըստ նրա, այդ խոսակցությունն այնքան տարօրինակ է եղել, որ իր իսկ անվտանգության համար է այդ քայլին գնացել: Տիգրան Ասատրյանը նաեւ պատմել է, որ ձայնագրիչն ու կասետը վերացրել է, իսկ արված ձայնագրությունն անցկացրել ֆլեշկայի վրա ու պահել:
Արփինե ՍԻՄՈՆՅԱՆ
