Եվրոպայի խորհրդի խորհրդարանական վեհաժողովը (ԵԽԽՎ) ամառային նստաշրջանի լիագումար նիստում ընդունել է «Մամուլի պատասխանատվություն և էթիկա. փոխելով լրատվական միջավայրը» բանաձևը՝ հիմնված ուկրաինացի պատվիրակ Վոլոդիմիր Արիևի զեկույցի վրա:
Վեհաժողովը մտահոգված է, որ սրընթաց փոփոխությունների դարաշրջանում լուրջ մարտահրավերներ են նետված լրատվադաշտին: Ուստի բանաձևով կոչ է արվում անդամ երկրների լրատվամիջոցներին ստորագրել էթիկայի վարքականոններ, ներդնել մամուլի օմբուդսմենի ինստիտուտը և մեխանիզմներ, որոնք հնարավորություն կտան ընթերցողների դժգոհություններն ու դիտարկումները տեղ հասցնել:
Ըստ Վեհաժողովի` այդ դեպքում հնարավոր կլինի երաշխավորել լրատվամիջոցի որակյալ արտադրանքը, անհրաժեշտության դեպքում ուղղել սխալները և հաշվետու լինել հանրության առաջ:
Վեհաժողովը կարևորում է նման ինքնակարգավորման ինստիտուտների կայացումը, որի շնորհիվ լրատվամիջոցը կկարողանա հնարավորինս խուսափել պետական և այլ սեկտորների ազդեցությունից:
Կարդացեք նաև
ԵԽԽՎ-ն լրատվամիջոցներին նաև կոչ է անում զերծ մնալ ատելության խոսքի և ռասիզմի տարածումից:
Տաթև ՀԱՐՈՒԹՅՈՒՆՅԱՆ
