Տնտեսագիտության դոկտոր, պրոֆեսոր Վարդան Բոստանջյանը «Փաստարկ» մամուլի ակումբում հայտարարեց, թե իշխանությունների՝ աուդիտ անցկացնելու մասին որոշումը ընդամենը ժամանակ շահելու միջոց է, իսկ ՀԷՑ-ի ազգայնացումը նա անհրաժեշտ համարեց:
Aravot.am-ի հարցին՝ արդյոք հարցի լուծո՞ւմ է այն, որ կառավարությունը պետք է սուբսիդավորի սոցիալապես անապահով քաղաքացիների հոսանքի սակագինը, պարոն Բոստանջյանը պատասխանեց. «Դա հարցի լուծում չէ: Կառավարությունը, եթե փոխհատուցի, ապա դրանով խնդիրը չվերջացավ»:
Ըստ Վարդան Բոստանջյանի՝ այստեղ հարց է առաջանում՝ կառավարությունը որտեղի՞ց պետք է տրամադրի այդ գումարները ու մանրամասնեց. «Կենսաթոշակային բավարարվածության համար գանձապետարանում փող չկա, այդ որտեղի՞ց պետք է փոխհատուցի: Լավագույն դեպքում, եթե կառավարությունը փոխհատուցելու է, էլի մեր փողն է փոխհատուցելու, ուրեմն բուդկաներից, չպաշտպանվածներից բերված փողը բերելու է փոխհատուցի»:
Մեր այն հարցին՝ իշխանություններն այս քայլերով չե՞ն փորձում մանիպուլացնել ժողովրդին, պարոն Բոստանջյանը պատասխանեց. «Ինչ ուզում եք անունը դրեք՝ մանիպուլյացիա և այլ: Մեր իշխանությունները նստած մտածում են, որ սրանց հետ կատակ անելը հղի է վտանգներով: Մինչև հիմա մկան կատվի խաղ էր տեղի ունենում, Բաղրամյանի դեպքերից հետո լավ էլ մտահոգված են, հասկանում են, որ հանկարծ սելավը ելավ, դեմը առնել հնարավոր չէ»:
Կարդացեք նաև
Մեր հարցին՝ «Ոչ թալանին» նախաձեռնության անդամները աուդիտին մասնակցել-չմասնակցելու հարցով խորհրդակցե՞լ են իր հետ, և արդյոք ճի՞շտ կլինի մասնակցել աուդիտին, պարոն Բոստանջյանն ասաց. «Հանգամանքների բերումով` ինձ հետ չեն խոսել, կան աուդիտի ավելի լավ մասնագետներ, օրինակ՝ տղաս: Բայց կարծում եմ, որ բանակցային ռեժիմը քաղաքակիրթ ձև է, և անգամ եթե քեզ խաբում են, բանակցություններն ավելի ողջունելի են, քան հարվածելը: Հարվածելուց հալվա չեն բաժանում»:
Տաթև ՀԱՐՈՒԹՅՈՒՆՅԱՆ
