ՀՀ վերաքննիչ դատարանը քիչ առաջ մերժել է Սյունիքի մարզպետի դեմ մահափորձի գործով մեղադրյալ Գարեն Աթաջանյանի պաշտպան Վահան Հովհաննիսյանի ներկայացրած բողոքը`առաջին ատյանի դատարանի` կալանքի որոշման դեմ: Կալանքի մասին առաջին ատյանի դատարանի որոշումը բողոքող կողմն ամբողջությամբ անհիմն է համարում ու պնդում է, որ այդ ամենը չի բխում միջնորդությանը կից ներկայացված նյութերից:
Aravot.am-ի հետ զրույցում Վահան Հովհաննիսյանն ասաց. «Եվ հիմնավոր կասկածն էր բացակայում, եւ կալանավորման հիմքերն ու պայմանները: Առաջին ատյանի դատարանի որոշումը կազմված էր կոպիտ դատավարական խախտումներով, նաեւ Սահմանադրության ու Մարդու իրավունքների կոնվենցիայի խախտումներով»: Հաշվի առնելով այս հանգամանքները, կողմը դիմել էր վերաքննիչ:
«Բայց հետաքրքիրն այն էր, որ շուրջ մեկ ժամ մեր ներկայացրած բողոքը, որը 15 էջից էր կազմված, դատավորն ընդամենը 6-7 րոպեում, խորհրդակցական սենյակում, ուսումնասիրեց, եզրակացություն կազմեց որոշում կայացրեց»,- մանրամասներ ներկայացրեց Վահան Հովհաննիսյանը:
Սա անակնկալ, բայց տարօրինակ չէր փաստաբանի համար. «Ի սկզբանե ամեն ինչ պարզ էր ու հասկանալի էր, թե ինչ է լինելու»:
Կարդացեք նաև
Այնուհանդերձ, վերաքննիչի որոշումը ևս կբողոքարկվի: «Վճռաբեկը, կարծում եմ ավելի օբյեկտիվ ու անկողմնակալ կլինի»,- մեր հարցին ի պատասխան ասաց Վահան Հովհաննիսյանը:
Նելլի ԳՐԻԳՈՐՅԱՆ
