Քաշաթաղի շրջկենտրոն Բերձորի մարզադաշտում օգոստոսի 1-ին կայացավ մինի ֆուտբոլի «Բերձոր-2015» առաջնությունը, որին մասնակցեցին Բերձոր քաղաքում գործող կառույցների 7 թիմ: Մրցաշարը կազմակերպել էր շրջվարչակազմի աշխատակազմի մշակույթի և երիտասարդության հարցերի բաժինը: Մի քանի օրվա խաղերից հետո հուլիսի վերջին օրը կայացավ «Փրկարար»-«Տաշիր» /քաղաքապետարանի կոմունալ բաժին/ թիմերի խաղը՝ 3-րդ տեղի համար: ԼՂՀ Արտակարգ իրավիճակների վարչության Քաշաթաղի շրջանային բաժնի «Փրկարար» թիմը միայն հաղթանակի դեպքում, այն էլ 4 գնդակի առավելությամբ կարող էր հայտնվել 3-րդ հորիզոնականում: Հակառակ դեպքում 3-րդ տեղում կհայտնվեր Բերձորի գիշերօթիկ հաստատության թիմը:
6-1 հաշվով հաղթեց «Փրկարար»-ը և ապահովեց 3-րդ տեղը: Առաջնության հաղթողի համար մրցեցին շրջկենտրոնի «Բերձոր» ֆուտբոլային հավաքական թիմի/մարզիչ՝ Ռոբերտ Քոչարյան/ «Երիտասարդական-1» և «Երիտասարդական-2» թիմերի ֆուտբոլիստները: «Երիտասարդական-1»-ում ընդգրկված էին «Բերձոր»-ի երիտասարդները, իսկ «Երիտասարդական-2»-ում՝ աշակերտական տարիքի ֆուտբոլիստները:
Ամբողջ մրցաշարի ընթացքում լավ հանդես եկած այս թիմերը հավաքել էին հավասար միավորներ և միմյանց հետ մրցեցին երկրորդ անգամ՝ եզրափակիչում: Հիմնական ժամանակում թիմերից ոչոքի չհաջողվեց հասնել հաջողության, չնայած «Երիտասարդական-2»-ի դարպասին նշանակվեց տուգանային 7-մետրանոց հարված: «Երիտասարդական-1»-ի հարձակվողի հարվածը շեղ ստացվեց: Խաղի ընթացքում բավականին ակտիվ հանդես եկան դպրոցականները, բայց մրցակցի դարպասապահ Օնիկ Բաբայանը կարողացավ չեզոքացնել վտանգը: Հիմնական ժամանակում գրանցվեց 0-0 արդյունք: Ըստ կանոնակարգի՝ թիմերը մրցեցին տուգանային 7 մետրանոց հինգական հարվածներով: 4-3 հաշվով հաղթեց «Երիտասարդական-1» թիմը՝ հիմնականում իրենց դարպասապահի լավ խաղի արդյունքում: Հաղթող թիմը պարգևատրվեց մշակույթի և երիտասարդության հարցերի բաժնի դիպլոմով և 30.000 դրամական պարգևով:
Հաղթողները մրցանակը փոխանցեցին Բերձորի գիշերօթիկ հաստատությանը: ՄԵ բաժնի դիպլոմի արժանացան նաև «Երիտասարդական-2»-ի դարպասապահ Օնիկ Բաբայանը՝ «Լավագույն դարպասապահ» և «Երիտասարդական-2»-ի հարձակվող Արսեն Գևորգյանը՝ «Լավագույն ֆուտբոլիստ» անվանակարգերում: ՄԵ բաժնի սպորտի գծով առաջատար մասնագետ, մշցաշարի անցկացնող Արմեն Պետրոսյանը, հանձնելով մրցանակները, շնորհավորեց հաղթողներին, շնորհակալություն հայտնեց մասնակիցներին, օժանդակողներին, մրցավարներին: Չնայած «Երիտասարդական-2»-ը պարտվեց եզրափակիչում, բայց պատանիները լավ խաղացին մրցաշարի ընթացքում: Լավ խաղ ցուցաբերեցին հարձակվող Ժորա Սարգսյանը, դարպասապահ Ռուբեն Մարտիրոսյանը:
Կարդացեք նաև
Օգոստոսի 15-ին 1-ին և 2-րդ տեղերը գրաված թիմերն արդեն հանդես կգան «Բերձոր» թիմի կազմում միացյալ ուժերով՝ Շուշի քաղաքում մասնակցելով ֆուտբոլի հանրապետական առաջնությանը: Հուսանք՝ «Բերձոր-2015» մրցաշարն էլ իր դրական ազդեցություն կունենա, որ հանրապետական առաջնությունում «Բերձոր»-ը հանդես գա հաղթանակներով:
Զոհրաբ Ըռքոյան
