Լանդսկրոնայում ծանրամարտի Եվրոպայի չեմպիոնի կոչումը նվաճած հայ ծանորդուհուն ոսկե մեդալը շնորհեց Հայաստանի ծանրամարտի ֆեդերացիայի փոխնախագահ Վահան Խեչանյանը:
Շվեդները Լանդսկրոնա քաղաքում ընթացող ծանրամարտի Եվրոպայի մինչեւ 15 եւ 17 տարեկանների առաջնության ընթացքում արդեն անգիր են արել Հայաստանի օրհներգը:
Այսօր աղջնակների կրտսեր տարիքային խմբում գերազանց հանդես եկավ 15-ամյա Աիդա Մանուկյանը, որն անթերի կատարեց բոլոր վեց մոտեցումները: Պոկում վարժությունն սկսելով 74 կգ-ից՝ հաջորդ իսկ մոտեցմամբ նա պատվիրեց 78 կգ, որը մեկ կիլոգրամով ավելի էր անցած տարի Լեհաստանում նույնպես Հայաստանի ներկայացուցիչ Արփինե Դալալյանի սահմանած Եվրոպայի ռեկորդից, իսկ ավելի ուշ եւս երեք կգ-ով (81) թարմացրեց արդեն իր բարձրագույն նվաճումը:
Կարդացեք նաև
Հրում վարժությունում նույնպես Աիդան ոչ մի «վրիպում» թույլ չտվեց եւ երրորդ մոտեցումով բարձրացնելով նաեւ 89 կիլոգրամը՝ երկամարտի 170 կգ արդյունքով նվաճեց այս տարիքային խմբի Եվրոպայի չեմպիոնի կոչումը:
Հայաստանի պատանի ծանրորդները Շվեդիայում արդեն նվաճել են չորս ոսկե եւ երկու արծաթե մեդալ: Իսկ պայքարը դեռ չի ավարտվել:
Աշոտ ՀԱԿՈԲՅԱՆ
