Հայաստանում Ռուսաստանի 102-րդ ռազմաբազայի զինծառայող Վալերի Պերմյակովի կողմից 7 հոգու սպանության գործը ուղարկվել է Հայաստանի իրավապահ մարմիններին: Այս տեղեկությունը «Interfax»-ին հաղորդել է Ռուսաստանի Դաշնության քննչական կոմիտեի պաշտոնական ներկայացուցիչ Վլադիմիր Մարկինը:
«Հայաստանի Հանրապետության 7 քաղաքացիների սպանության համար Վալերի Պերմյակովին պատասխանատվության ենթարկելու նպատակով զինծառայողի նկատմամբ հարուցված քրեական գործն ուղարկվել է Հայաստանի Հանրապետության իրավապահ մարմիններին, որոնք համապատասխան որոշում կկայացնեն»,- նշել է նա:
Հիշեցնենք, որ երեկ Ռուսաստանի Դաշնության Հյուսիս-կովկասյան օկրուգի զինվորական դատարանը 10 տարվա ազատազրկման է դատապարտել 102-րդ ռազմաբազայի դասալիք զինծառայող Վալերի Պերմյակովին: Նա մեղավոր է ճանաչվել ՌԴ քրեական օրենսգրքի 3 ՝ զենքով դասալքության, հրաձգային զենք-զինամթերք հափշտակելու եւ դրանք ապօրինի կրելու հոդվածներով, այն է՝ ՌԴ Քրեական օրենսգրքի 338 հոդվածի 2-րդ, 226 հոդվածի 3-րդ, 222 հոդված 1-ին մասերով:
Պատրաստեց Աշոտ ԻՍՐԱԵԼՅԱՆԸ
Կարդացեք նաև
