Հսկայական կառույցներն այդ տեղում դնելը իրատեսական չէ: Այս մասին օգոստոսի 18-ին «Հենարան» մամուլի ակումբում լրագրողների հետ հանդիպման ընթացքում, անդրադառնալով Կարեն Դեմիրճյանի անվան մարզահամերգային համալիրի վաճառքին, ասաց Հայաստանի ճարտարապետների միության նախագահ Մկրտիչ Մինասյանը:
«Մի բան շատ պարզ է՝ Մարզահամերգային համալիրի տարածքը, որն իր գործառույթները պետք է պահպանի, ինչպես կար հաղորդագրության մեջ, եւ Եղեռնի հուշահամալիրը անձեռնմխելի գոտիներ են: Ես չեմ պատկերացնում, թե նրանք ինչի կարելի է վերածել եւ ինչ հնարավորության վրա կարելի է դնել այդ շենքերը: Վերջին հաշվով՝ նրանք դեռ մնում են մեր ազգային արժեքներից մեկը: Եթե մենք մոտենում ենք Եղեռնի համալիրին նույն ձեւով, այն տրամաբանությամբ, որ այն նույնիսկ հետո պետք է շահույթ բերի, ուրեմն՝ չգիտեմ, թե ինչպե՞ս կարելի է մտածել այդ ուղղությամբ»,- ասաց նա:
Անդրադառնալով բազմաֆունկցիոնալ համալիրում խաղատան առկայությանը՝ Մկրտիչ Մինասյանը նկատեց, որ Հայաստանը այնքան փոքր է, որ շատ մեծ տարածք պետք չէ անցնել խաղատուն գնալու համար. «Մենք պետք է զբաղվենք ընդհանրապես քաղաքի զարգացմամբ, եւ եթե առաջինը մուտք գործեց, մուտք կգործի նաեւ երկրորդը, երրորդը եւ դրա վտանգը կա վերջին հաշվով»:
Ամի ՉԻՉԱԿՅԱՆ
