«Իմ կարծիքով՝ այդպիսի որոշում կառավարությունը չպիտի կայացներ»,- օգոստոսի 19-ին «Բլից ինֆո» մամուլի ակումբում լրագրողների հետ հանդիպման ընթացքում, անդրադառնալով «Կարեն Դեմիրճյանի անվան մարզահամերգային համալիրի» վաճառքին, ասաց ճարտարապետ Սաշուր Քալաշյանը:
Նա նշեց, որ ամբողջ Ծիծեռնակաբերդի տարածքը համարվում է բնության պահպանության տարածք, եւ Մարզահամերգային համալիրի շինությունը վաճառելու արգելք չկա. «Ամբողջ դժգոհությունը կամ ցասումն այն է, որ թույլատվություն է տրվում կողքին կառուցել մի համալիր, որը Մարզահամերգային համալիրին գուցե հավասարազոր է զանգվածով: Դա է խնդիրը: Եվ այդ ամեն ինչն անել հանրային օգտագործման տարածքում, որի համար քաղաքապետարանը, ըստ այս նախագծի, հավանություն է տվել, որ 8 հեկտար կամ 8.5 հեկտար հողամաս հատկացվի եւ սեփականաշնորհման կարգով տրվի ներդրողին: Ո՞վ է ներդրողը, ոչ մեկիս պարզ չէ, լավ կլիներ, որ հնարավորություն ունենայինք ներդրողին էլ կանչել այստեղ, գուցե շատ լավ մտքեր ունի, նաեւ կիսվեր հետներս, ասեր՝ ինչ է ուզում անի, մենք էլ հավանություն տայինք կամ քննադատեինք: Բայց դա մնում է անհայտ»:
Նա նկատեց, որ այդ տարածքում նաեւ Ծիծեռնակաբերդն է, որը համազգային նշանակություն ունի, եւ պետք է բիզնես ծրագրերի հետ կապ չունենա. «Մինչեւ այս որոշումը մենք բազմիցս բողոքել ենք այդ հողի վրա, որ այնտեղ որեւէ խրախճանքի երեւույթներ չլինեն, մինչդեռ այսօր այնտեղ երկու ապօրինի ռեստորանային կառույց գոյություն ունի, որոնք գործում են անօրեն ձեւով, նրանց տերերն էլ, հովանավորներն էլ պարզ չէ, թե ովքեր են: Մենք բազմիցս բողոքել ենք, դիմել ենք, որպեսզի հանեն այդ օբյեկտները այդ տարածքից, տեղափոխեն մեկ այլ տեղ, ոչ ոք արձագանք չի տվել: Դիմումներ ուղարկել ենք ե՛ւ նախագահին, ե՛ւ քաղաքապետարան, բոլոր տեղեր: Բոլոր տեղերում էլ արձագանքն այնպիսին է, որ նրանք ուժ չունեն այդ հարցը լուծելու, ավելի զորեղ ուժեր են հետեւում կանգնած: Իսկ թանգարանի աշխատողները մշտապես բողոքում են, որ այդ խորովածի հոտերը եւ երեկոյան ժամերին այնտեղի հարսանյաց հանդեսները հեչ կապ չունեն հուշահամալիրի հետ, աղավաղում են երեւույթը»:
Իսկ խաղատան առկայությունը ճարտարապետն անհասկանալի է համարում. «Եթե այդպիսի թեմայով մենք կառուցապատում ենք անում հանրային օգտագործման տարածքում, դա նշանակում է՝ առհասարակ վերջ, ցեղասպանության թանգարանի, ցեղասպանության միջոցառումների քաղաքական խնդրի վերաբերյալ վերջ: Տպավորություն է, որ եթե մենք թեզ էինք դրել հիշենք եւ պահանջենք՝ անմոռուկի գաղափարը, ապա ստացվում է, որ միայն այդ 100 մլն դոլարի մասի՞ն էր խոսքը հատուցման պահանջի, տվեցին եւ արդեն մենք մոռանա՞նք: Ստացվում է այդպես: Նշանակում է, որ Էրդողանն ու Դավութօղլուն հրճվանքի մեջ կկորեն»:
Կարդացեք նաև
Սաշուր Քալաշյանը հավելեց, որ հարցում է կատարել մշակույթի նախարարություն, սակայն պատասխան է ստացել, որ նախարարությունը տեղյակ չէ գործընթացից. «Այսինքն՝ շրջանցվում է այն բոլոր օրենսդրական դաշտերը, որը քաղաքաշինության օրենսդրությամբ է պահանջվում: Շրջանցվում է պարզապես կամ չի գիտակցվում, ես չգիտեմ»:
Ամի ՉԻՉԱԿՅԱՆ
