«Զարմանալի է նախ եւ առաջ, թե ինչո՞ւ է այդ շինությունը տրվել պաշտպանության նախարարությանը: Պաշտպանության նախարարությունը հազար ու մի ավելի կարեւոր գործառույթ ունի, բայց ոչ թե համերգներ եւ սպորտային միջոցառումներ կազմակերպելը: Ես կհասկանայի, եթե փորձ արվեր նորից կենդանացնել»,- «Անալիտիկ» ակումբում լրագրողների հետ հանդիպմանը Մարզահամերգային համալիրի վաճառքի մասին նման կարծիք հայտնեց քաղաքագետ, Հանրային խորհրդի անդամ Սուրեն Զոլյանը:
Լրագրողներից մեկի դիտարկմանը, թե հնարավո՞ր է, որ համալիրը տրվել է ՊՆ-ին, քանի որ նրա հաշվապահությունը չի ստուգվում, քաղաքագետն այսպես արձագանքեց. «Պաշտպանության նախարարության գործառույթը պաշտպանելն է: Հիմա հարց է ծագում. ի՞նչը եւ ումի՞ց են պաշտպանում: Հարցը այդպես դրեք: Սա այն աբսուրդներից, որ իրոք անհասկանալի է»:
Սուրեն Զոլյանը նշեց, որ եթե ՊՆ-ն մարզահամերգային համալիրում թատրոններ կազմակերպեր, լավ կլիներ, «բայց դա իր գործառույթը չէ: Նրա գործառույթը, նախ և առաջ սահմանը պաշտպանելն է, ոչ թե այլ անհասկանալի գործառույթներ իրականացնելը»:
Աշոտ ԻՍՐԱԵԼՅԱՆ
