Գրականության ինստիտուտի տնօրեն Վարդան Դևրիկյանի համոզմամբ, Հայաստանում անցկացված վերջին զորավարժությունները ցույց տվեցին պետության ուժը, հասարակության համախմբվածությունը:
Այսօր «Հայելի» ակումբում նա նկատեց, որ զորավարժությունները ցույց տվեցին նաեւ, որ Հայաստանում մարտունակ ժողովուրդ կա, ու կարեւոր էին նաեւ արագ արձագանքման մեխանիզմներ ստեղծելու առումով. «Այստեղ ոչ միայն արտակարգ իրավիճակների, քաղպաշտպանության, այլեւ մոբիլիզացիոն կողմը կար… Հոգեբանորեն մեզ հիշեցրեց, որ Աստված չանի, եթե պատերազմը վերսկսվի, դա ընդգրկելու է կյանքի բոլոր ոլորտները եւ սա կարեւոր էր ոչ միայն երկրի անվտանգության առումով»:
Հոգեբան Ռուբեն Աղուզումցյանը զորավարժությունները ուշացած է համարում. «Այն հնարավորություն է տալիս համապատասխան հմտություններ, ունակություններ ձեռք բերել: Այսպիսի միջոցառումները պատահականություն չեն ու կապված չեն ոչ թե սահմանային լարված իրադրությունների հետ, այլ պետական քաղաքականություն են»:
Նա կարծիք հայտնեց, որ զորավարժությունները պետք է ունենան մշտական բնույթ եւ բազմակողմանի. «Խորհրդային տարիներին բոլոր հիմնարկները պարբերաբար նման զորավարժություններ էին անցկացնում, դա ցույց էր տալիս, թե կառավարման համակարգը ինչքանով է պատրաստ տարբեր իրադրություններին»:
Կարդացեք նաև
Ըստ նրա, ինֆորմացիոն բոլոր օղակները շատ լուրջ պետք է աշխատեն՝ տեղեկացնելու, ադրբեջանական կեղծ լրատվությանը հակազդելու համար. «Հիմա սահմանային դեպքերը ավելի շատ են մեկնաբանվում, ու թվում է, թե շատացել են դեպքերը, բայց իրականում չեն շատացել, պարզապես դրա մասին շատ են խոսում»:
Արփինե ՍԻՄՈՆՅԱՆ
