Ինչպես արդեն տեղեկացրել ենք Եվրոպայի խորհրդի խորհրդարանական վեհաժողովը (ԵԽԽՎ) լիագումար նիստում ընդունեց Ստեֆան Շեննախի «Վեհաժողովի մոնիտորինգի գործընթացի առաջընթացը» վերտառությամբ բանաձևը:
Փաստաթղթում անդրադարձ կա նաև ՀՀ-ում ընթացող սահմանադրական փոփոխություններին: Նշենք, որ այն բաժնում, որտեղ մոնիտորինգի հանձնաժողովն իր մտահոգություններն է հայտնում մոնիտորինգի ենթարկված երկրների վերաբերյալ, ՀՀ-ի մասին ևս դրույթ կա: Մասնավորապես 11.2 կետում ամրագրված է. «քաղաքական միջավայրի շարունակվող բևեռացումը, այդ թվում Սահմանադրական բարեփոխումների պատճառով»:
ԵԽԽՎ-ում հայաստանյան պատվիրակության ղեկավար Հերմինե Նաղդալյանը Aravot.am-ի հետ զրույցում նշեց, որ բևեռացումը սահմանադրական փոփոխությունների գործընթացով չէ պայմանավորված ու հավելեց. «Բևեռացումը վատ բան էլ չէ. դա խոսում է այն մասին, որ կա կարծիքների տարբերություն և բախում, ինչը ժողովրդավարական հասարակությանը հարիր ամենակարևոր հատկանիշներից է: Մենք էլ ենք հաճախ այդ մտահոգությունը հայտնում` դա ձևակերպելով այնպես, որ բևեռացումը, երբ լինում է անհիմն, մենք էլ ենք դրա համար անհանգստանում»:
Տիկին Նաղդալյանը հիշեցրեց, որ վերջին երկու ամսվա ընթացքում, ԵԽԽՎ մոնիտորինգի հանձնաժողովն ամենաքիչը երեք անգամ անդրադարձել է սահմանադրական գործընթացներին` զեկույցի, համազեկուցողների տեղեկատվական փաստաթղթի և մոնիտորինգի հանձնաժողովի ընդունած հայտարարության տեսքով: Այս առիթով տիկին Նաղդալյանը նկատեց. «Բոլորում էլ հիմնական միտքն այն մասին է, որ ԵԽԽՎ-ն ողջունում է ՀՀ-ում սահմանադրական գործընթացի ընթացքն ու կազմակերպումը»:
Կարդացեք նաև
Ինչպես նշել տեղեկացրել էինք` ԵԽԽՎ հայաստանյան պատվիրակության անդամ, ՀԱԿ խմբակցության ղեկավար Լևոն Զուրաբյանն առաջարկությունով էր հանդես եկել` մասնավորապես բանաձևի նախնական տարբերակի 9-րդ կետը, որը շարադրված էր «Հայաստանի իշխանությունների ջանքերը (efforts) սահմանադրական բարեփոխումների ուղղությամբ» վերաշարադրել: Արդյունքում այն ընդունվեց «սահմանադրական փոփոխությունների գործընթացը սկսելը» տարբերակով:
Այս առաջարկի համար տիկին Նաղդալյանը Լևոն Զուրաբյանին շնորհակալություն հայտնեց ու նշեց. «Ես շնորհակալ եմ Լևոն Զուրաբյանին, որը բանաձևի վերաբերյալ արեց մի առաջարկ, և դրանով էլ ավելի հստակեցրեց ու հասցեական դարձավ ԵԽԽՎ վերաբերմունքը սահմանադրական փոփոխությունների նկատմամբ դրական իմաստով: Եթե մինչև այս կար 9.2 կետում անորոշություն, Զուրաբյանի առաջարկից հետո ընդունվեց հստակ սահմանադրական փոփոխությունների գործընթացը սկսելը բանաձև: ԵԽԽՎ-ն ողջունում է սահմանադրական փոփոխությունների գործընթացը նախաձեռնելը: Այս փոփոխությունը շատ ավելի ուժեղացրել է հանձնաժողովի դրական վերաբերմունքը, այն ոչ միայն դեբատների վրա է տարածել, այլ ողջ գործընթացի վրա՝ սկսած նախաձեռնելու պահից մինչ այսօր: Սա պատասխան է նաև շատ այն հարցադրումների, որոնք հնչում էին ՀԱԿ –ի գործիչների կողմից, արդյոք անհրաժե՞շտ էին, թե՞ ոչ այս սահմանադրական բարեփոխումները:
Զուրաբյանն ի տարբերություն ՀԱԿ-ը ներկայացնող կարծր դիրքորոշում ունեցող դեմքերի՝ իր սեփական նախաձեռնությամբ այս հարցի հստակ պատասխանը տվեց, որ մեր երկրին անհրաժեշտ էին սահմանադրական բարեփոխումները»:Այս առիթով տիկին Նաղդալյանը հիշեց չերչիլյան խոսքերը. «Երկրի ներսում երկիրս չեմ գովել, իսկ երկրից դուրս չեմ փնովել»:
Այնուհետև նկատեց. «Կարծում եմ Լևոն Զուրաբյանը շահագրգիռ և սրտացավ գործչի կեցվածք դրսևորեց»: Դառնալով մոնիտորինգի հանձնաժողովի անդրադարձին այն մասին, որ էլեկտրաէներգիայի թանկացման ցույցերի ժամանակ խաղաղ ցուցարարների նկատմամբ բռնությունները պետք է հետաքննվեն, տիկին Նաղդալյանը նշեց, որ իրենք Սարաևոյում էլ են այդ մասին խոսել և համապատասխան մարմինները հենց այդպես էլ վարվում են, քննությունն ընթանում է:
Սահմանադրական փոփոխությունների հանրաքվեի մասին դրույթի առիթով տիկին Նաղդալյանն ասաց. «Միջազգային չափանիշներով հանրաքվե անցկացնելու հասցեատերը բոլոր քաղաքական ուժերն են: Այսինքն՝ մոնիտորինգի հանձնաժողովը կոչ է անում ողջ քաղաքական դաշտին, յուրաքանչյուրն իր պատասխանատվության շրջանակներում ներգրավվածություն ունենալ այս գործընթացում»:
Տաթև ՀԱՐՈՒԹՅՈՒՆՅԱՆ
