Բաղանիս-Ոսկեպար շրջանցիկ, Ադրբեջանի սահմանագոտուց որոշակիորեն հեռու ճանապարհն անցնելով՝ ավտոմեքենաները Ոսկեպարի Սուրբ Աստվածածին եկեղեցու մոտ հայտնվում են ադրբեջանական գնդակոծության գոտում: Դա կարելի է բացառել, եթե Ոսկեպար գյուղով ձգվող համայնքային նշանակության ճանապարհը նորոգ լինի եւ ճանապարհը գնդակոծվելու դեպքում մեքենաները ուղին շարունակեն Ոսկեպարի միջով:
Այդ հարցում աջակցելու համար Ոսկեպարի գյուղապետ Երվանդ Եգանյանը խնդրանքով դիմել է պաշտպանության նախարար Սեյրան Օհանյանին: Վերջինիս հրամանով հատկացվել է 2 տոննա սոլյարկա:
Ոսկեպարի գյուղապետարանը հայթայթել է անհրաժեշտ տրանսպորտային միջոցներ, ոսկեպարցիները մասնակցել են խճապատման աշխատանքներին: Գյուղի ներքեւից սկիզբ առնող ճանապարհի 200 գծամետր հատվածն ամբողջությամբ խճապատվել է:
Բացի այդ, Ոսկեպարով ձգվող ճանապարհի փոսերը նորոգվել, խճով լցվել են: Ընդհանուր առմամբ, բեռնատարները 70 ուղերթ կատարելով՝ Ոսկեպարի վերեւից խիճ են տեղափոխել կարեւոր ճանապարհը նորոգելու համար:
Կարդացեք նաև
Գյուղապետ Ե. Եգանյանն ասաց, որ հատկապես տեղանքին անծանոթ վարորդները պետք է տեղյակ լինեն, որ Նոյեմբերյան-Իջեւան ճանապարհի այդ հատվածի գնդակոծության դեպքում պետք է երթեւեկեն Ոսկեպարով ձգվող համեմատաբար ապահով այդ ճանապարհով:
Ոսկան ՍԱՐԳՍՅԱՆ
