Այսօր Peoplemeter ակումբում տեղի ունեցավ Հայաստանում Ճապոնիայի դեսպանատան բացմանը նվիրված`«Ավանդույթից արդիականություն» խորագիրը կրող` հայ–ճապոնական ժամանակակից արվեստի ցուցահանդեսին նախորդող ասուլիս: Ասուլիսը կազմակերպել էր Վարդիթեր Հարությունյանը: Բանախոսներն էին ճապոնացի արվեստագետներ Էմմա Յուկին, Միյաձակի Միեն, հայ նկարիչներ`Արա Հայթայանը, Խաչատուր Մարտիրոսյանը:
Վարդիթեր Հարությունյանը ներկայացրեց ցուցահանդեսի կազմակերպման առիթը ,և իր խոսքում ասաց, որ նմանատիպ ցուցահանդես կազմակերպվել է նաև Ճապոնիայում`Հայաստանի դեսպանատան բացման ժամանակ, իսկ այժմ հերթն է նման ցուցահանդես արդեն մեզ մոտ` Ճապոնիայի դեսպանատան բացման առթիվ:«Ցուցահանդեսին մասնակցում են երկու տասնյակ արվեստագետներ Հայաստանից և Ճապոնիայից: Վաղը` Հ. Շարամբյանի անվան ժողովրդական ստեղծագործության կենտրոնում կլինի ցուցադրություն, և այն շարունակական կլինի մինչև հոկտեմբերի 30-ը»:
Aravot.am-ի հարցին, թե ինչ նմանություններ և տարբերություններ կան` հայ արվեստի և ճապոնական մշակույթի միջև, և ինչն է դուր եկել Հայաստանում ճապոնացի արվեստագետներին` Միյաձակի Միեն ասաց. «Առաջին անգամ եմ լինում Հայաստանում: Ինչպես մենք, այնպես էլ դուք ունեք ավանդապաշտություն, բայց մենք պետք է գիտակցենք, որ մարդը գնում է դեպի արդիականություն: Ինձ դուր է գալիս հայ մարդու բարությունն ու ջերմությունը, իսկ մշակույթի առումով ասեմ, որ հայկական գույները շատ խոսուն էին ինձ համար, և ես ձեր մոտ գտա այնպիսի վառ գույներ, որոնցից չեմ տեսել ոչ մի տեղ՝ նույնիսկ Ճապոնիայում»:
Կարդացեք նաև
Նկարիչ Արա Հայթայանը կարևորում է նման միջոցառումները և նկատում, որ ժամանակային առումով բնականաբար շատ քիչ է լիարժեք հասկանալ ճապոնական արվեստը: Նույն բանը նաև հայ մշակույթի պարագայում:«Ողջունում եմ երկկողմ համագործակցությունը և ցանկանում եմ, որ բարեկամությունը հարատև լինի»:
ՀԱՅԿ Մագոյան
