Հատուկ քննչական ծառայությունը պատասխանել է Խոսքի ազատության պաշտպանության կոմիտեի հարցմանը: Այս մասին «Տեղեկատվության ազատությունը Հայաստանում օրենսդրություն եւ պրակտիկա» թեմայով կլոր սեղանի ընթացքում ասաց Խոսքի ազատության պաշտպանության կոմիտեի նախագահ Աշոտ Մելիքյանը:
Նա նշեց, որ կոմիտեն շարունակում է հետեւել հունիսի 23-ին Բաղրամյան պողոտայի դեպքերին եւ պետական մարմիններին տարբեր հարցումներ է ուղարկում: Խոսքի ազատության պաշտպանության կոմիտեն Հատուկ քննչական ծառայությունից հետաքրքրվել է, թե արդյոք ՀՔԾ-ն դատախազության ցուցումից հետո կազմավորե՞լ է քննչական խումբ, քանի՞ քննիչ է ներգրավված այդ խմբում, այլ իրավապահ մարմիններից մասնագետներ ներգրավվա՞ծ են, թե՞ ոչ:
«Հատուկ քննչական ծառայությունը իր ոճի մեջ է մնացել, եթե նախորդ նամակին պատասխանել էին, որ մեր հարցված տեղեկությունները նախաքննական գաղտնիք են, հրապարակման ենթակա չեն, ապա այս դեպքում իրենք երեք հարցից պատասխանել են մեկին, ասել են, որ այդ գործը հիմա քննում է քննչական խումբը: Քանի՞ քննիչ է, ո՞ր իրավապահ մարմիններից են ներգրավված մասնագետները, դրա պատասխանը չկա: Եվ սա շատ տարածված մոտեցում է. ոչ ամբողջական պատասխան տալը, փաստորեն, մեր պետական մարմինների համար արդեն բավականին տարածված եւ տհաճ երեւույթ է դարձել: Առայժմ միակ լուրջ պայքարի ձեւը դատարան դիմելն է»,- ասաց Աշոտ Մելիքյանը:
Կարդացեք նաև
Ամի ՉԻՉԱԿՅԱՆ
