«Նոր ժամանակներ» կուսակցության նախագահ Արամ Կարապետյանը ԵԽԽՎ քաղաքական հանձնաժողովի ընդունած՝ Ռոբերտ Ուոլթերի՝ Ղարաբաղի վերաբերյալ զեկույցը համարում է հայ դիվանագիտության պարտություն: Նա կարծում է, որ այդ զեկույցի ընդունումը կապված չէ միայն խավիարային դիվանագիտության հետ, այլ ռուսական հարցերով հայկական դիրքորոշման պատճառով նեղացած են Հայաստանից. «Ուստի իմ կարծիքով՝ փորձում են Հայաստանին տեղը դնել»:
Ըստ Արամ Կարապետյանի՝ ՌԴ ԱԳ նախարար Սերգեյ Լավրովի այցը ՀՀ ԱԳ նախարարի հրավերն էր՝ պարզ ասած ասելու, «ձեր պատճառով է ԵԽԽՎ-ն մեզ հետ նման կերպ վարվում»:
Արամ Կարապետյանի կարծիքով՝ Լավրովի հայտարարություններից ուշագրավ է այն, որ նա հայտարարեց, թե սեպտեմբերի 7-ի պայմանավորվածությունը Պուտինն ամբողջությամբ պատրաստ է կատարել, բայց եթե դիվանագիտական լեզվով հասկանանք, նա նկատի ուներ, որ նաև հայկական կողմն էլ ինչ որ պարտավորություններ ունի:
Ըստ պարոն Կարապետյանի՝ Լավրովի այցից հետո Մինսկի խմբի համանախագահների բավականին կոշտ հայտարարությունը հենց այդ հանդիպման արդյունք էր. «Լավրովն, ըստ էության, ասաց, որ եթե մեր պատճառով եք տուժել, կգնանք կպայմանավորվենք, որ ԵԽԽՎ զեկույցը որևէ ազդեցություն չունենա Ղարաբաղի վրա: Մինսկի խմբի համանախագահների հայտարարությունը ցույց է տալիս, որ աշխարհի ուժեղները հակամարտության կարգավորումը կապում են ստատուս քվոյի հետ»: Ադրբեջանի սահմանային ակտիվացումները, մասնավորապես հայկական կողմերի զոհերը, պարոն Կարապետյանը կապում է հենց այդ զարգացումների հետ:
Կարդացեք նաև
Դառնալով ԵԽԽՎ զեկույցին՝ պարոն Կարապետյանը նշեց, որ բոլոր նման զեկույցները կգումարվեն իրար և դրանց քանակական աճը կարող է հանգեցնել որակական փոփոխության:
Պարոն Կարապետյանը, հաշվի առնելով այն հայտարարությունները, որոնք մեր պետական պաշտոնյաներն անում են, սկսել է հասկանալ, թե «այն հաշիշը, որն ԱԱԾ-ն բռնագրավում է,ուր է գնում: Այնպիսի տպավորություն է ստեղծվում, որ այդ մարդիկ ինչ-որ առումով կտրված են իրականությունից»:
ՀՀ-ԵՄ նոր համաձայնագրին անդրադառնալով՝ Արամ Կարապետյանն ասաց. «Եթե մեջը փող չկա, ապա այդ փաստաթուղթը ենթակա չէ ստորագրելու: ՀՀ իշխանությունը հիմա ամեն տեղ փող է ման գալիս: Երկիրը ապրում է վարկերի հաշվին»:
Տաթև ՀԱՐՈՒԹՅՈՒՆՅԱՆ
