Կոմիտաս-Բուդաղյան փողոցների խաչմերուկի մոտակայքում գտնվող «Այո»-ի շտաբում միջադեպ է գրանցվել`լրագրողներին թույլ չեն տալիս ներս մտնել եւ պարզել, թե ի՞նչ է կատարվում ներսում`բացատրելով, որ դա մասնավոր տարածք է: Խոսքի ազատության պաշտպանության կոմիտեի նախագահ Աշոտ Մելիքյանը հեռախոսազրույց էր ունեցել Ոստիկանության հասարակայնության հետ կապերի եւ լրատվության վարչության պետ Աշոտ Ահարոնյանի հետ եւ տեղեկացրել միջադեպերի մասին։ Վերջինս նույնպես ասել է, որ շտաբը մասնավոր տարածքում է եւ հորդորել է դիմել «Այո»-ի կենտրոնական շտաբին։
«Այո»-ի շաբի պետի տեղակալ, ՀՀԿ-ական Վահրամ Բաղդասարյանն Aravot.am-ի հետ զրույցում այս առիթով ասաց, որ հանրաքվեի օրը եւ նախորդ օրը քարոզչական շտաբ լինել չի կարող, օրենքն է սահմանափակում դնում, քանի որ այդ օրերին քարոզչությունն արգելվում է:
Նույն տարածքում, ավելի վաղ, ՀՀԿ անդամ ներկայացած մի կին խոչընդոտել էր «Ազատություն» ռադիոկայանի լրագրողի աշխատանքը: Այս եւ նմանատիպ այլ ահազանգերի առիթով էլ Վահրամ Բաղդասարյանն ասաց, որ նման մասնավոր երեւույթներ կարող են լինել, բայց, իր կարծիքով, նման առաձին դեպքերով չի կարելի ընդհանուր տպավորություններ կազմել քվեարկության ընթացքի մասին: «Կլինեն նման երեւույթներ, հանրապետության ողջ տարածքով մեկ չենք բացառում նման դեպքերը: Եթե մարդիկ նկատում են կամ գիտեն, թե ովքեր են գումար բաժանողները`թող ահազանգեն համապատասխան մարմիններին: Կարծում եմ, արդեն կան համապատասխան հարուցված գործեր նման երեւույթների հետ կապված, քննությունն ամեն ինչ կպարզի»,- ասաց Վահրամ Բաղդասարյանը:
Նելլի ԳՐԻԳՈՐՅԱՆ
