Երկրապահ կամավորների միության վարչության նախագահ Մանվել Գրիգորյանի հասցեին հնչած վիրավորանքներն անհետևանք մնալ չեն կարող, չէ՞ որ Մանվել Գրիգորյանը շատերի համար «ազիզ» գեներալ է: Իրենց գեներալի «պատիվը» պաշտպանելու գործողությունները դեռ շարունակվում են՝ ազատամարտիկ Յուրիկ Աթոյանին հիմա էլ ինչ-որ մարդիկ են հետևում: «Ես հիմա վախենում եմ ոչ թե իմ կյանքի համար, այլ իմ ընտանիքին վնաս չհասնի: Ես եթե դուրս եմ եկել պայքարելու, գիտեմ իմ վերջաբանն ինչ է, բայց ինչ մնում է իմ երեխաներին, իմ ընտանիքին… ձեռքը չհասնի մինչև այնտեղ».- նշում է Յուրիկ Աթոյանը:
Հիշեցնենք, որ ազատամարտիկը Հիմնադիր խորհրդարանի գաղափարակից է, մասնակցում է «Նոր Հայաստան» հանրային փրկության ճակատի գործողություններին: Ազատության հրապարակում «Ոչ»-ի հանրահավաքին վերջինս վիրավորական արտահայտություններ էր ասել Մանվել Գրիգորյանի և Սերժ Սարգսյանի հասցեին, ինչին արձագանքել էին Շիրակի տարածաշրջանի երկրապահները, իրենց նախագահ Յուրա Ալեքսանյանի գլխավորությամբ: «Այդ օրը մի ապուշ ծխախոտն ինձ վրա շպրտելով՝ ասաց. «Սա՞ է էդ թուրքը, մեր ազիզ գեներալին բան ասողը»: Ես էլ պատասխանեցի՝ դա՞ է ազիզ գեներալը ձեր։ Քաշքշեցինք իրար, երևի 12 հոգի կլինեին, ոչ պակաս: Իրենց հետ էլ տեսախցիկ կար նկարելու, ուզում էին նկարեին միջադեպը, որ տանեին իրենց գեներալին ցույց տային».- պատմում է Յուրիկ Աթոյանը: Եւ փաստաթղթեր է ցույց տալիս, որոնք ապացուցում են, որ ինքը մասնակցություն է ունեցել Արցախյան հերոսամարտին, մեդալներ է ստացել: Սա ի պատասխան Յուրա Ալեքսանյանի, ով հայտարարել էր, թե Յուրիկ Աթոյանը ոչ մի կապ չի ունեցել Արցախյան գոյամարտի հետ:
Հրապարակումն ամբողջությամբ՝ «Հրապարակ» թերթի այսօրվա համարում:
