«The Beautified Project» ռոք խումբը, թուրքահայ երգչուհի Սիբիլը և ժողովրդական նվագարանների թուրք կատարողներ Գյոքսել Բաքտագիրը, Բուրաք Մալչոքը, Օսման Յուրդալ Թոքջանը և Մերթ Էլմասը դեկտեմբերի 14-ին նույն բեմում էին:
Հայ և թուրք երաժիշտները Երևանի Հակոբ Պարոնյանի անվան երաժշտական կոմեդիայի թատրոնում հանդես եկան «Ներդաշնակության մեղեդին» խորագրով համերգով:
Հայ հանդիսատեսին ներկայացվեցին «The Beautified Project»-ի անգլերեն և հայերեն երգերը՝ նոր գործիքավորմամբ:
«Ներդաշնակության մեղեդի»-ի շրջանակում ստեղծվել է նաև «Don’t blame me» («Ինձ մի մեղադրիր») երգը, որը կատարվեց համերգի ընթացքում: Իսկ մեկ շաբաթ հետո այն կներկայացվի նաև Ստամբուլում: Այս երգը հեղինակել է «The Beautified Project»-ի հիմնադիր Անդրե Սիմոնյանը: Առաջիկայում Հայաստանում և Թուրքիայում կնկարահանվի նոր երգի տեսահոլովակը:
Կարդացեք նաև
Անդրե Սիմոնյանը համերգից առաջ լրագրողների հետ ճեպազրույցում ընդգծեց, որ նորաստեղծ այս երգը քաղաքական ենթատեքստ չունի. «Սա զրույց է հայ և թուրք հասարակ քաղաքացիների միջև»,- ասաց նա:
«Մենք չէինք պատկերացնի, որ ամեն ինչ այսքան լավ կլինի,- նշեց թուրքահայ երգչուհի Սիբիլը.- երկու տարբեր երաժշտություն, Արևելքն ու Արևմուտքը միացան: Հոյակապ բան ստացվեց: Կարծում եմ, որ նույնքան հետաքրքիր նախաձեռնություն է նաև այս ամենը վավերագրական ֆիլմի վերածելը: Ֆիլմ, որը կպատմի մեր ծանոթության, գործակցության և համերգների մասին»:
Ձախ ձեռքով նվագելու իր ինքնատիպ ոճով հայտնի թուրք քանոնահար Գյոքսել Բաքտագիրը առաջին անգամ է Հայաստանում: Տպավորված է. «Հասցրել եմ լինել Մատենադարանում, ծանոթանալ մշակութային տարբեր նմուշների: Շատ հաճելի է տեսնել՝ ինչպես է Հայաստանը տեր կանգնում իր գեղեցիկ մշակույթին:
Ծիծեռնակաբերդ, ցավոք, չենք հասցրել այցելել, քանի որ համերգի պատճառով շատ խիտ գրաֆիկ ունեինք: Սակայն ուզում եմ նշել, որ մենք այստեղ ենք երաժշտության միավորող ուժով խաղաղության ու հաշտության սերմեր տարածելու համար»,- ասաց Գյոքսել Բաքտագիրը:
Նշենք, որ նախաձեռնությանն աջակցել է ՀՀ-ում ԱՄՆ դեսպանությունը:
«Շատ մեծ կարևորություն ունեն նման նախաձեռնությունները հատկապես այն ժողովուրդների համար, որոնց միջև եղել են շփումներ, բայց ոչ բավարար մակարդակով,- ասաց ՀՀ-ում ԱՄՆ արտակարգ և լիազոր դեսպան Ռիչարդ Միլսը,- և ԱՄՆ դեսպանությունը շատ ուրախ է, որ կարողանում է աջակցել նախաձեռնությանը, որը միավորում է տարբեր ազգերի երաժիշտներին, և որի շրջանակում ձևավորվում է մեղեդիների ներդաշնակություն: Երաժշտությունը միավորում է մարդկանց և ժողովուրդներին, այն վերացնում է արգելքները, բացում սահմանները»:
Հավելենք, որ նույն համերգը դեկտեմբերի 22-ին տեղի կունենա նաև Ստամբուլում:
Սիրանուշ ՀԱՅՐԱՊԵՏՅԱՆ
խորին շնորհակալութիւններ՝ ՀՀ-ում ԱՄՆ դեսպանության
իսկ քեզի ալ՝ աֆֆերի՛մ, Սիբիլ
(չէ, անվանդ հետ – շատ դիւրին – բառախաղ մը ընելու սիրտ չունիմ… )