Հնդկաստանում Հայաստանի դեսպան Արմեն Մարտիրոսյանն այցելել է այդ երկրի Ուպուգուդա նահանգում գտնվող 17-րդ դարի հայկական գերեզմանոցները: «Ես ցնցված եմ այստեղ գալուց հետո: Ես կարոտախտ եմ զգում: Մենք պետք է վերականգնենք այս գերեզմանոցները, որպեսզի ապագա սերունդները տեսնեն անցյալի նշույլները»,- ըստ Tehindu.com-ի, մեկ ժամ գերեզմանոցում անցկացնելուց հետո ասել է դեսպանը:
Կայքը նշել է, որ դա զգացմունքային այց էր, որը դեսպանին կապել է իր անհայտ հայրենակիցների հետ, որոնք մահացել են դարեր առաջ: Նրանք ոչ դեսպանի նախնիներն են, ոչ էլ վերջինս գիտի նրանց գոյության մասին, բայց Մարտիրոսյանի հուզմունքը երեւում էր, երբ նա քայլում էր փոքր գերեզմանոցում:
Դեսպանն ասել է, որ եթե գերեզմանը վերականգնելու ծրագրերն իրագործվեն, ապագայում այս քաղաք այցելելով հայերը տեղեկություններ կստանան իրենց հայրենակիցների մասին, որոնք ապրել են այնտեղ դարեր առաջ:
Հնագիտության վարչության աշխատակիցները ոգեւորվեցին, երբ Արմեն Մարտիրոսյանը վստահեցրեց իրենց, որ նախաձեռնել է 20 գերեզմանաքարերի թարգմանությունը, որոնցից 19 հայ, մեկն էլ հոլանդացի առեւտրականներինն են:
Կարդացեք նաև
Գերեզմանի հնագիտական պեղումները կարող են կատարվել մինչեւ վերականգնումը: Հայկական պատվիրակության անդամներն ասել են, որ կնկարեն բոլոր գերեզմանները եւ գիրք կհրապարակեն հանգուցյալների մասին:
«Սովորաբար զբոսաշրջիկները, որոնք գալիս են Հնդկաստան, այցելում են Ագրա, Կոլկաթա եւ Չենայի, քանի որ գիտեն, որ այնտեղ մի քանի եկեղեցիներ եւ գերեզմաններ կան: Մենք միջոցներ կձեռնարկենք, որ տեղեկատվություն տարածենք Հիդերբադի գերեզմանոցի մասին»,- ասել է Արմեն Մարտիրոսյանը:
Հնագիտության վարչության աշխատակիցն էլ հավելել է, որ 16-ից 17-րդ դարերում բազմաթիվ հայ առեւտրականներ եկել են Հնդկաստան եւ բնակվել Հիդերբադ քաղաքում: «Չնայած նրանց գործունեության մասին գրավոր վկայություններ չկան, բայց հայերի գերեզմանները խոսում են նրանց ներկայության մասին»:
Պատրաստեց Աշոտ ԻՍՐԱԵԼՅԱՆԸ
