«Ես չգիտեի, որ այսպիսի սկանդալային ասեկոսեներ կան մեր դեսպան Միքայել Մինասյանի մասին: Եվ երեւի ճիշտ չեք պատկերացնում, որ արտաքին գործերի նախարարն ամեն ասեկոսեի կապակցությամբ հետո պետք է պարզի՝ դա եղել է, թե ոչ»,- լրագրողների հետ հանդիպմանը հայտարարեց ՀՀ արտաքին գործերի նախարար Էդվարդ Նալբանդյանը:
Լրագրողները նախարարից հետաքրքրվեցին, թե իրականությանը համապատասխանո՞ւմ են այն տեղեկությունները, թե Մարդու իրավունքների պաշտպան Կարեն Անդրեասյանի հրաժարականը պայմանավորված է Վատիկանում ՀՀ դեսպան Միքայել Մինասյանի հետ ունեցած խնդիրների եւ այս պատճառով պաշտպանի նկատմամբ ճնշումներով:
Նա կարծիք հայտնեց, թե տարօրինակ կլինի, որ այդպիսի ասեկոսեների վերաբերյալ նախարարը հարցում անի կամ քննարկումներ անցկացնի: «Տարօրինակ է պատկերացնել, որ մամուլի ասուլիսի ընթացքում ԱԳ նախարարը դեսպանների թերությունները պետք է հրապարակային մամուլին հայտնի, կամ նրանք, ովքեր ավելի լավ են աշխատում, մամուլով շնորհակալություն ասվի: Թերացող դեսպանները չեն մնում իրենց տեղում, փոխվում են»:
Աշոտ ԻՍՐԱԵԼՅԱՆ
