«ԶԼՄ-ներում ես կարդում եմ, որ Եվրոպայի խորհրդի խորհրդարանական վեհաժողովի ընդունած բանաձեւերի հարցում սարսափելի բան չկա, ամեն ինչ նորմալ է: Իմ կարծիքով` սա հետ քայլ է: Սա մեծ մինուս է Հայաստանի համար: Այս զեկույցները կարդացողները հասկանում են` Ադրբեջանի դիվանագիտությունն հաջողությամբ անցկացնում է իր կեղտոտ քաղաքականությունը»,- այս մասին Բլից ինֆո մամուլի ակումբում լրագրողների հետ հանդիպմանն ասաց Արցախյան ազատամարտի հերոս, գեներալ-մայոր Արկադի Տեր-Թադեւոսյանը («Կոմանդոսը»):
Ըստ նրա՝ դեռեւս 10 առաջ հայ մասնագետները սկսեցին հայտարարել, որ մեր ջրերի 45-50%-ը գնում է Ադրբեջան. «Այսինքն` մեր ջրերը գնում են Ադրբեջան: Այնտեղ գյուղացիները բերք են աճեցնում: Մենք անընդհատ հայտարարում ենք, որ մեր ջրերը գնում են Ադրբեջան եւ հանկարծ հենց նույն ադրբեջանցիներն ասում են, որ Սարսանգի ջրամբարը փակ է եւ մեզ ջուր չի տալիս»:
Արկադի Տեր-Թադեւոսյանը հայտարարեց, որ պատերազմում հաղթողը չի կարող պարտվել դիվանագիտության մեջ. «Ես չեմ քննադատում, բայց մենք պետք է ընդունենք եւ հասկանանք մեր սխալները, որպեսզի հետագայում նման բան չլինի: Հիմա չի կարելի խոսել, թե հաշիվը 1-1 է կամ 2:0, դա գեղեցիկ չէ: Մենք շատ ենք օգտագործում խավիարային դիվանագիտություն տերմինը: 1-2 անգամ կարելի է դա ասել, բայց պնդել, որ մեր հակառակորդն այնքան պարզ է, որ խավիարով գնում է ամեն ինչ, սխալ է»:
Աշոտ ԻՍՐԱԵԼՅԱՆ
