Քիչ առաջ ԱԺ-ում «Ժառանգության» պատգամավոր Զարուհի Փոստանջյանը Էդմոն Մարուքյանի եւ Հովհաննես Մարգարյանի հետ պաշտոնապես ներկայացրեցին Մարդու իրավունքների պաշտպանի իր թեկնածության փաստաթղթերը:
Մինչ ԱԺ պետաիրավական հարցերի հանձնաժողովի նախագահ Հովհաննես Սահակյանի աշխատասենյակ մտնելը, Հովհաննես Մարգարյանը հույս հայտնեց, որ ամեն ինչ լավ է լինելու եւ իրենց սատարած թեկնածուն շանսեր ունի՝ ձայները 6:6 են լինելու:
Զարուհի Փոստանջյանի խոսքերով՝ 6:6 կլինի, եթե սաբոտաժ չանեն:
Կարդացեք նաև
Ճանապարհին՝ ԱԺ միջանցքում հանդիպեց ՀՀԿ խմբակցության քարտուղար Գագիկ Մելիքյանը: Զարուհի Փոստանջյանը նրան հրավիրեց, որ միանա իրենց՝ իր թեկնածության փաստաթղթերը ներկայացնելիս:
«Ես միացել եմ նրան, ում որ պետք է միանայի»,- պատասխանեց Գագիկ Մելիքյանը: Տիկին Փոստանջյանն էլ արձագանքեց՝ դուք սխալվել եք:
Հովհաննես Սահակյանը Զարուհի Փոստանջյանի համար փորձեց ջերմ ընդունելություն կազմակերպել. «Մի հատ կոնյակ, բան բերեք, էս փաստն արձանագրենք: Օրինակ, տիկին Փոստանջյանի վերջին դրական փոփոխությունները միանգամից աչքի է զարնում՝ էս համեստությունը, կասինկա ա կապել, բան…»:
Զարուհի Փոստանջյանն ակամայից նայեց իր պարանոցին, թե ի՞նչ կասինկա, ի՞նչ բան, ընդամենը վերնաշապիկ է հագել:
Հովհաննես Սահակյանը մի քանի անգամ հորդորեց, թե մի կոնյակ բացենք. «Դուք մեր առաջին թեկնածուն եք, առաջին օմբուդսմենը կլինեք տենց անաչառ»:
Զարուհի Փոստանջյանն էլ ասաց. «Հուսով եմ, հանձնաժողովը կգործի իրավունքի գերակայությամբ»: Հովհաննես Սահակյանը հարցրեց՝ իսկ երբեւէ մեր հանձնաժողովը ոչ իրավունքի գերակայության սկզբունքով գործե՞լ է»: Տիկին Փոստանջյանը պատասխանեց. «Այո, օրինակ, այս վերջերս, երբ ստանձնեց պարտականություն ինքը առաջադրի թեկնածուներին, չէ՞ որ սա վերապահված էր Մարդու իրավունքների հանձնաժողովին: Ողջամտությունը եւ իրավունքի գերակայությունը դա է պահանջում»:
Պարոն Սահակյանն էլ արձագանքեց՝ մեր եւ ձեր ողջամտությունն իրարից տարբերվում է:
Խոսքով ընկնելով՝ Հովհաննես Սահակյանը մոռացավ կոնյակի մասին: Երբ արդեն դուրս էին եկել աշխատասենյակից՝ Զարուհի Փոստանջյանը կես ճանապարհից հետ դարձավ, թե բա կոնյակ էր խոստացել, ո՞ւր է, էլի՞ խաբեցին, այդտեղ էլ խաբեցին, կոնյակն էլ չբացեցին:
Հովհաննես Մարգարյանն առաջարկեց, որ կոնյակն ինքը բացի, հրավիրեց իր սենյակ՝ Զարուհի Փոստանջյանը ՀՀԿ-ի կոնյակն էր ուզում. «Գիտեմ, որ դուք կբացեք, ուզում եմ Հանրապետականի լինի»:
Ավելի ուշ Հովհաննես Սահակյանը որքան էլ հետ կանչեց, որ կոնյակն արդեն բացել եմ, եկեք՝ Զարուհի Փոստանջյանն էլ չգնաց:
Հռիփսիմե ՋԵԲԵՋՅԱՆ
