Երեւանի Կենտրոն եւ Նորք Մարաշ վարչական շրջանների ընդհանուր իրավասության դատարանում, դատավոր Մնացական Մարտիրոսյանի նախագահությամբ, տեղի ունեցավ դեկտեմբերի 6-ին, Սահմանադրական փոփոխությունների հանրաքվեի օրը, Երեւանի 114 դպրոցում տեղակայված 10/20 ընտրատեղամասում այլ անձի փոխարեն քվեարկելու գործով նախնական դատական նիստ:
Արմեն Մեհրաբյանին, Արամայիս Նադարյանին եւ Դավիթ Նադարյանին մեղադրանք է ներկայացվել այն բանի համար, որ հանրաքվեի օրը նրանք գրանցված լինելով տարբեր տեղամասերում, գնացել եւ քվեարկել են Երեւանի 114 դպրոցում տեղակայված 10/20 ընտրատեղամասում: Իսկ Լուսինե Մնացականյանին մեղադրանք է առաջադրվել այն բանի համար, որ թույլատրել է վերոնշյալ քաղաքացիների իրենց անձնագրերով քվեարկել Լուսինե Ասլանյանի, Մարիամ Դեմիրճյանի եւ Անահիտ Հարությունյանի փոխարեն, ընտրացուցակի 1-ին, 2-րդ, 3-րդ համարի ներքո գտնվող սյունակներում:
Դատական նիստի սկզբում ամբաստանյալների պաշտպան Սարգիս Մադաթյանը միջնորդեց, որ նիստերի դահլիճում գտնվող լրագրողները չնկարեն իր պաշտպանյալների դեմքերը, քանի որ, ըստ նրանց, դա կարող է վնասել իրենց:
Կարդացեք նաև
Ամբաստանյալները նաեւ նշեցին, որ ընդունում են իրենց առաջադրված մեղադրանքներն ու միջնորդեցին արագացված կարգով դատաքննությունն իրականացնել:
Մեղադրող դատախազ Տիգրան Ենոքյանը նշեց, որ արագացված կարգով դատաքննությունն իրականացնելու միջնորդության վերաբերյալ առարկություն չունի: Դատարանը բավարարեց միջնորդությունը:
Դատական վիճաբանությունների փուլում դատախազը խնդրեց հանձնաժողովի անդամ Լուսինե Մնացականյանին տուգանել 600.000 դրամի, իսկ այլ անձի փոխարեն քվեարկած 3 ամբաստանյալներին՝ 500.000 դրամի չափով:
Պաշտպան Սարգիս Մադաթյանն էլ խնդրեց պատիժ նշանակելիս հաշվի առնել, իր ամբաստանյալների դրական բնութագրերը եւ մեղմ վերաբերվել:
Իրենց վերջին խոսքում ամբաստանյալները խնդրեցին մեղմ պատիժ կիրառել:
Դատարանը հեռացավ խորհրդակցական սենյակ, վճիռ հրապարակելու:
Աշոտ ԻՍՐԱԵԼՅԱՆ
